كۇنى كەشە عانا پرەزيدەنتىمىز جولداۋىندا ناقتى رەفەرەندۋمنىڭ كۇنىن بەلگىلەپ بەردى. ارينە، حالىق ءوز تاڭداۋىن جاساي جاتار. ءبىراق ءبىر نارسە انىق: وڭتۇستىك ايماقتاردا ەنەرگيا تاپشىلىعى وتە وزەكتى ماسەلە.
اەس سالۋ ارقىلى بۇل تاپشىلىقتى جويۋدىڭ ناقتى شەشىمى قولىمىزدا تۇر. ۇلكەن اۋىلىندا 31 كوپقاباتتى تۇرعىن ءۇي بار. ءقازىر ولاردىڭ 22-سىندە عانا ادامدار تۇرىپ جاتىر، قالعان ۇيلەر بوس تۇر.
كوپتەگەن عيماراتتار كەزىندە جەكەمەنشىككە ءوتىپ كەتكەن. اۋىلدا مەكتەپ پەن شاعىن ورتالىقتان باسقا الەۋمەتتىك نىساندار جوق. وندا 300-گە جۋىق وقۋشى ءبىلىم الادى. اۋىلدىق اكىمدىك قىزمەتكەرلەرى كوپقاباتتى ۇيلەردىڭ بىرىندە ورنالاسقان 4 بولمەلى پاتەردە جۇمىس ىستەۋگە ءماجبۇر.
مادەنيەت ءۇيى مەشىتكە اينالعاندىقتان، مادەني ءىس-شارالار مەن جينالىستار ۇلكەن ورتا مەكتەبىنىڭ ءماجىلىس زالىندا وتەدى. اۋىلدا اۋرۋحانا جوق، تۇرعىندار دارىگەرلىك كومەك الۋ ءۇشىن ۇزىناعاشقا، قونايەۆقا نەمەسە الماتىعا بارۋعا ءماجبۇر، بۇل ءۇشىن 350-400 شاقىرىمداي جول جۇرۋگە تۋرا كەلەدى.
اۋىلداعى ەكى بالاباقشا عيماراتى جەكەنىڭ قولىندا. اەس سالىنادى دەگەن اڭگىمە شىققالى بەرى ۇلكەندە جەكەمەنشىككە وتكەن عيماراتتار مەن پاتەرلەردىڭ باعاسى شارىقتاپ ءوسىپ جاتىر.
جەرگىلىكتى تۇرعىندار اەس سالىنۋى ارقىلى شالعاي اۋىلداعى الەۋمەتتىك تۇيتكىلدەر ءوز شەشىمىن تابادى دەگەن ۇلكەن ۇمىتتە.