ەنەرگەتيكا مينيسترلىگى مەن ەكسپەرتتىك قاۋىمداستىقتىڭ مالىمەتتەرىنە سۇيەنسەك، قازىرگى زامانعى اتوم ەلەكتر ستانسيالارىندا اپات بولۋ ىقتيمالدىعى 10-نىڭ مينۋس 7 دارەجەسىندە، ياعني جىلىنا 10 ميلليون جىلدا ءبىر رەت اپات بولۋى مۇمكىن. بۇل كورسەتكىش — وتە تومەن ىقتيمالدىق، ياعني زاماناۋي رەاكتورلاردىڭ قاۋىپسىزدىگى جوعارى دەڭگەيدە قامتاماسىز ەتىلگەن.
تاريحتاعى اتوم ەنەرگەتيكاسىنا قاتىستى بارلىق ينسيدەنتتەر ەسكەرىلىپ، قازىرگى رەاكتورلاردىڭ جوبالارىنا سايكەس وزگەرىستەر ەنگىزىلگەن. سوندىقتان زاماناۋي اەس-تەر قاۋىپسىزدىك تۇرعىسىنان بارىنشا سەنىمدى.
بۇگىندە الەمنىڭ 31 ەلىندە 400-دەن استام اتوم رەاكتورى جۇمىس ىستەپ تۇر. بۇل ەلدەر قاتارىندا اقش، فرانسيا سياقتى الپاۋىت ەلدەر بار، ولار اتوم ەنەرگەتيكاسىن بەلسەندى تۇردە پايدالانىپ كەلەدى. كورشىلەس قىتايدا 56 رەاكتور جۇمىس ىستەسە، تاعى 27 رەاكتوردىڭ قۇرىلىسى جۇرگىزىلۋدە. بۇل اتوم ەنەرگەتيكاسىنىڭ الەمدە كەڭىنەن قولداۋ تاباتىنىن كورسەتەدى.
اتوم ەنەرگەتيكاسى ەلىمىز ءۇشىن تۇراقتى جانە سەنىمدى ەنەرگيا كوزى بولىپ تابىلادى. ونىڭ قاۋىپسىزدىگى مەن تيىمدىلىگى الەمدىك تاجىريبەدە دالەلدەنگەن. بەيبىت اتوم ارقىلى ءبىز ەنەرگەتيكالىق تاۋەلسىزدىككە قول جەتكىزىپ، ەلىمىزدىڭ تۇراقتى دامۋىن قامتاماسىز ەتە الامىز.