ادام پاپيللوما ۆيرۋسى (اپۆ) — 200-دەن استام ءتيپى بار ۆيرۋستار توبىنا جاتاتىن جۇقپالى اۋرۋ. ۆيرۋس نەگىزىنەن جىنىستىق قاتىناس ارقىلى جۇعادى، ءبىراق تۇرمىستىق جاعدايلاردا دا جۇعۋ ىقتيمالدىعى جوعارى.
ۆيرۋس كوبىنە ءوز بەلگىلەرىن بايقاتپايدى، سوندىقتان ادامدار ونىڭ بار ەكەنىن بىلمەي، باسقالارعا جۇقتىرۋى مۇمكىن. بۇل ۆيرۋستىڭ كەيبىر تۇرلەرى ءقاۋىپتى، ويتكەنى ولار جاتىر موينى وبىرى سياقتى ونكولوگيالىق اۋرۋلارعا اكەلۋى مۇمكىن.
ۆيرۋس جۇقتىرعان كەزدە ول وزدىگىنەن كەتپەي، جاتىر موينى جاسۋشالارىنا وزگەرىستەر اكەلۋى مۇمكىن، راك الدى قابىنۋلارعا، ۋاقىتىلى ەمدەلمەگەن جاعدايدا جاتىر موينى وبىرىنا اكەلۋى مۇمكىن. ينكۋباسيالىق كەزەڭ بىرنەشە ايدان 10-15 جىلعا دەيىن سوزىلۋى مۇمكىن. اسىرەسە 6، 11، 16، 18 تيپتەرى ونكولوگيالىق اۋرۋلارعا اكەلۋى مۇمكىن.
اپۆ-نىڭ بەلگىلەرى تەرى مەن شىرىشتى قاباتتاردا كىشكەنتاي وسىندىلەردىڭ، جىنىس مۇشەلەرىندە ۇشكىر كونديلومالاردىڭ پايدا بولۋىمەن كورىنەدى. بۇل ۆيرۋستىڭ اسەرى ۋاقىتىلى ەمدەلمەسە، جاتىر موينى، انالدىق تەسىك، اۋىز قۋىسى، جىنىستىق مۇشە وبىرىنا اكەلۋى مۇمكىن.
ۆيرۋس جىنىستىق قاتىناس ارقىلى، تۇرمىستا جاناسۋ كەزىندە جانە جۇكتى ايەلدەن بالاعا جۇعۋى مۇمكىن.
قازاقستاندا جاتىر موينى وبىرىنىڭ تارالۋى بارلىق جاستاعى ايەلدەردىڭ اراسىندا ءسۇت بەزى وبىرىنان كەيىنگى ەكىنشى ورىندا تۇر. اسىرەسە 25-44 جاس ارالىعىنداعى ايەلدەردە كوپ كەزدەسەدى. جىل سايىن 1900-گە جۋىق ايەل جاتىر موينى وبىرىمەن تىركەلەدى، 600-دەن استام ايەل وسى كەسەلدەن قايتىس بولادى.
اۋرۋدىڭ الدىن الۋ شارالارى:
- كۇماندى ادامدارمەن جىنىستىق قاتىناسقا تۇسپەۋ.
- يممۋنيتەتتى نىعايتۋ، جىنىستىق اعزالاردى تازا ۇستاۋ، قابىنۋعا جول بەرمەۋ.
- ايەلدەرگە جىلىنا ەكى رەت دارىگەرگە كورىنىپ، ءتيىستى زەرتحانالىق تالداۋلار تاپسىرۋ.
- ەڭ باستىسى — ۆيرۋسقا قارسى ۆاكسيناسيا الۋ.
ادام پاپيللوما ۆيرۋسىنا قارسى ۆاكسينا جاتىر موينى وبىرىنان قورعايدى جانە ايەلدىڭ بالا تۋۋ قابىلەتىنە اسەر ەتپەيدى. بۇگىندە اپۆ-عا قارسى ۆاكسيناسيا الەمنىڭ 135 ەلىندە، سونىڭ ىشىندە كورشىلەس وزبەكستان، قىرعىزستان، تۇرىكمەنستان، رەسەيدە دە ەنگىزىلگەن. اپۆ-عا قارسى ۆاكسينا ءوزىنىڭ قاۋىپسىزدىگى مەن تيىمدىلىگىن الەمدىك دەڭگەيدە دالەلدەدى.
قازاقستاندا اپۆ-عا قارسى ۆاكسيناسيا 11 جاستاعى قىزدارعا جۇرگىزىلەدى، ويتكەنى دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا، 9-14 جاس ارالىعىندا ۆاكسيناسيالاۋ بارىنشا ءتيىمدى. ۆاكسينا ءبىلىم بەرۋ ۇيىمدارىنداعى ەگۋ كابينەتتەرىندە تەگىن نەگىزدە قولجەتىمدى. ۆاكسيناسيا اتا-انانىڭ نەمەسە قامقورشىنىڭ كەلىسىمىمەن جانە دارىگەردىڭ تەكسەرۋىنەن كەيىن جۇرگىزىلەدى.
گارداسيل ۆاكسيناسىمەن جۇرگىزىلەتىن ۆاكسيناسيا ەكى رەت، 6 ايلىق ينتەرۆالمەن ورىندالادى. سونىمەن قاتار، باس مەملەكەتتىك سانيتاريالىق دارىگەردىڭ 2024 جىلعى قاۋلىسىنا سايكەس، 12-13 جاستاعى قىزدارعا قوسىمشا ۆاكسيناسيالاۋ جۇرگىزىلەتىنىن حابارلايمىز.
قۇرمەتتى اتا-انالار! بۇگىنگى تاڭدا ءجاسوسپىرىم قىزداردى اپۆ-عا قارسى ۆاكسيناسيالاۋ تۋرالى شەشىم قابىلداي وتىرىپ، ءسىز ولاردى بولاشاقتا ونكولوگيالىق اۋرۋلاردان قورعايسىز!