اتوم ەلەكتر ستانسيالارىنىڭ (اەس) تيىمدىلىگى مەن قاۋىپسىزدىگىنە قاتىستى كوپتەگەن سۇراقتار تۋىنداۋدا، ءبىراق بۇل جەردە الەمدىك تاجىريبەگە نازار اۋدارۋ قاجەت.
اەس كۇن مەن جەل ەلەكتر ستانسيالارىنا قاراعاندا تۇراقتى ءارى سەنىمدى ەنەرگيا كوزى بولىپ تابىلادى. سەبەبى، اەس ءۇزىلىسسىز جۇمىس ىستەپ، بازالىق قۋاتتى تۇراقتى تۇردە قامتاماسىز ەتەدى، ال كۇن مەن جەل ەنەرگياسى اۋا رايى جاعدايلارىنا بايلانىستى تۇراقسىز بولۋى مۇمكىن.
اەس-تىڭ 3 جانە 3+ بۋىن رەاكتورلارى زاماناۋي قاۋىپسىزدىك تەحنولوگيالارىنىڭ ارقاسىندا اپات ءقاۋپىن ايتارلىقتاي ازايتادى. بۇل رەاكتورلار تولىقتاي جابىق جۇيەلەردە جۇمىس ىستەيدى، سوندىقتان راديواكتيۆتى قالدىقتاردىڭ سىرتقا شىعۋ ىقتيمالدىعى جوق. عالىمداردىڭ پىكىرىنشە، بۇل قالدىقتار كەلەسى بۋىن رەاكتورلارىندا قايتا وڭدەلىپ، تولىق جويىلادى، ال ولاردىڭ قورشاعان ورتاعا اسەرى مۇلدەم بولمايدى. بالقاش كولى مەن ونىڭ اينالاسىنداعى ەكولوگياعا دا ەشقانداي زيان كەلمەيدى.
مىسال رەتىندە گەرمانيا مەن ۆەنگريانىڭ ەلەكتر ەنەرگياسىن وندىرۋدەگى تاجىريبەسىن كەلتىرۋگە بولادى. گەرمانيادا 1 كيلوۆاتت-ساعاتىنا ەلەكتر ەنەرگياسىنىڭ قۇنى شامامەن 0،5 ەۆرونى قۇراسا، ۆەنگريادا بۇل كورسەتكىش 0،1 ەۆروعا تەڭ. بۇل ايىرماشىلىقتىڭ نەگىزگى سەبەبى – ۆەنگريا ەلەكتر ەنەرگياسىن اەس-تەن السا، گەرمانيادا ەنەرگيانىڭ كوپ بولىگى كۇن جانە جەل ەلەكتر ستانسيالارىنان كەلەدى. وسى فاكتىنىڭ ءوزى-اق اەس-تىڭ ەكونوميكالىق تۇرعىدان ءتيىمدى ەكەنىن دالەلدەي الادى.
اتوم ەنەرگەتيكاسى – بۇل تەك ەكونوميكالىق پايدا عانا ەمەس، سونىمەن قاتار ەكولوگيالىق قاۋىپسىزدىكتىڭ كەپىلى. ءبىز، قازاقستان، ءوزىمىزدىڭ ەنەرگەتيكالىق تاۋەلسىزدىگىمىزدى قامتاماسىز ەتۋ ءۇشىن جانە الەمدىك وزىق تاجىريبەنى قولدانۋ ءۇشىن وسى تەحنولوگياعا دەن قويۋىمىز كەرەك دەپ ويلايمىن.