الماتىدا وتكەن قوعامدىق تىڭداۋلاردا اتوم ەلەكتر ستانسياسىن سالۋدىڭ ەكولوگيالىق ارتىقشىلىقتارى تالقىلاندى، دەپ حابارلايدى aqshamnews.kz
اتوم ەنەرگەتيكاسى سالاسىنداعى جاڭا جوبالار قازاقستاننىڭ ەكولوگيالىق جانە ەكونوميكالىق تۇراقتىلىعىن نىعايتۋ ءۇشىن ماڭىزدى قادام بولىپ تابىلادى. وسىعان وراي الماتىدا قوعامدىق كەڭەس پەن الماتى ازاماتتىق اليانسى بىرلەستىگىنىڭ ۇيىمداستىرۋىمەن جاريا تالقىلاۋ ءوتتى. قوعامدىق تىڭداۋلار بارىسىندا اتوم ەلەكتر ستانسيالارىنىڭ ەكولوگيالىق تازا ەنەرگيا كوزى رەتىندەگى ارتىقشىلىقتارى ەرەكشە اتاپ ءوتىلدى.
ساراپشىلاردىڭ پىكىرىنشە، اتوم ەلەكتر ستانسيالارى جاھاندىق جىلىنۋ مەن كليماتتىڭ وزگەرۋىنە سەبەپشى بولاتىن كومىرقىشقىل گازى، مەتان جانە باسقا دا پارنيكتىك گازداردىڭ شىعارىلۋىن بولدىرمايدى. "بۇل ولاردىڭ اتموسفەراعا زيانىن ازايتۋ جانە دەكاربونيزاسياعا قول جەتكىزۋ ءۇشىن كۇرەستە ماڭىزدى قۇرال"، — دەپ اتاپ ءوتتى گۇلميرا مۋرسالوۆا.
قازاقستان رەسپۋبليكاسى ەنەرگەتيكا مينيسترلىگى اتوم ەنەرگەتيكاسى جانە ونەركاسىپ دەپارتامەنتى ديرەكتورىنىڭ ورىنباسارى گۇلميرا مۋرسالوۆا ءارتۇرلى ەنەرگيا كوزدەرىنىڭ ەكولوگياعا اسەرى تۋرالى ستاتيستيكالىق دەرەكتەردى ۇسىندى. ونىڭ ايتۋىنشا، قازاقستاندا كومىرقىشقىل گازى شىعارىندىلارىنىڭ 80%-ى ەنەرگەتيكا سەكتورىنا تيەسىلى.
"جاسىل ەنەرگيا ستانسيالارىن قۇرۋ ارقىلى ءبىز كومىرقىشقىل گازىنىڭ شىعارىندىلارىن 70 ميلليون تونناعا دەيىن ازايتا الامىز"، - دەدى ول.
جاسىل ەنەرگيا كوزدەرىنە كۇن، جەل، سۋ ەلەكتر ستانسيالارى، سونداي-اق اتوم ەلەكتر ستانسيالارى كىرەدى. ساراپشى اتوم ەلەكتر ستانسياسىنىڭ قۇرىلىسى الداعى رەفەرەندۋمنىڭ وڭ ناتيجەسى بولعان جاعدايدا عانا جۇزەگە اسىرىلاتىنىن ەسكە سالدى.
ەستەرىڭىزگە سالا كەتەيىك، قازاقستاندا اەس سالۋ بويىنشا جوبالاردى ىسكە اسىرۋ جوسپارلانۋدا. وسىعان بايلانىستى جاقىن ارادا رەفەرەندۋم وتەدى. الماتىداعى جاريا تىڭداۋلار قازاقستاندا وتكىزىلگەن تىڭداۋلاردىڭ ون توعىزىنشىسى بولدى.