سينوپتيكتەر قازاقستاندا الداعى كۇزدە قانداي اۋا رايى بولاتىنىن ايتتى. ولاردىڭ مالىمەتىنشە، كەيبىر وڭىرلەردە كوپ مولشەردە جاۋىن-شاشىن، ال كەي جەرلەردە ءتىپتى ۇسىك كۇتىلۋدە.
جىلى جانە از جاۋىن-شاشىندى اۋا رايى تەك قىركۇيەكتىڭ العاشقى ونكۇندىگىندە عانا ساقتالادى، سودان كەيىن اتموسفەرالىق فرونتتاردىڭ ءجيى اۋىسۋى رەسپۋبليكانىڭ كوپ بولىگىندە تۇراقسىز اۋا رايىنا اكەلەدى.
جاۋىن-شاشىن، ەكپىندى جەل جانە اۋا تەمپەراتۋراسىنىڭ ءجيى اۋىتقۋى كۇتىلەدى، ال سولتۇستىك ايماقتاردا تۇندە -1...-7 گرادۋسقا دەيىن ۇسىك بولۋى مۇمكىن.
وڭتۇستىك ايماقتاردا جوعارى قىسىم ايماعىنىڭ اسەرىنەن جاۋىن-شاشىن مولشەرى نورمادان تومەن بولادى، ال تەمپەراتۋرالىق فون سالىستىرمالى تۇردە جىلى بولىپ قالادى. دەگەنمەن، اي ىشىندە تەمپەراتۋرا بىرتىندەپ تومەندەيدى: تۇندە +15...+23 گرادۋستان +3...+10 گرادۋسقا دەيىن، ال كۇندىز +25...+35 گرادۋستان +15...+23 گرادۋسقا دەيىن.
قىركۇيەك ايىندا ايلىق ورتاشا تەمپەراتۋرا رەسپۋبليكا اۋماعىنىڭ كوپ بولىگىندە نورمادان 1 گرادۋسقا جوعارى، ال باتىستا، شىعىس پەن وڭتۇستىك-شىعىستىڭ تاۋلى ايماقتارىندا قالىپتى بولادى دەپ كۇتىلۋدە. قىركۇيەكتە جاۋىن-شاشىن مولشەرى رەسپۋبليكا اۋماعىنىڭ كوپ بولىگىندە نورماعا ساي جانە ودان كوپ، ال وڭتۇستىك ايماقتاردا نورمادان از بولۋى بولجانۋدا.
«قازان جانە قاراشا ايلارىندا كۇزدەن قىسقا بىرتىندەپ اۋىسۋ كۇتىلۋدە. جالپى العاندا، قازاقستاننىڭ نەگىزگى اۋماعىندا اۋا تەمپەراتۋراسى وتكەن جىلدارمەن سالىستىرعاندا تومەن بولادى، ال جاۋىن-شاشىن مولشەرى بارلىق وڭىرلەردە نورماعا ساي جانە ودان كوپ مولشەردە بولجانۋدا. تەك رەسپۋبليكانىڭ وڭتۇستىك-باتىسى مەن ورتالىعىندا جاۋىن-شاشىن مولشەرى نورمادان از بولادى»، - دەدى مەتەورولوگتار.