دوستىق ۇيىندە وتكەن ارداگەرلەرمەن كەزدەسۋدە ەلدەگى ەنەرگەتيكالىق قاۋىپسىزدىكتى قامتاماسىز ەتۋدەگى اەس-تىڭ ءرولى تالقىلاندى. اقمولا وبلىستىق ارداگەرلەر كەڭەسىنىڭ ءتوراعاسى ەرمەك نۇعمانوۆ بۇل جوبانىڭ بولاشاق ۇرپاق ءۇشىن ماڭىزدى ەكەنىن اتاپ ءوتتى:
"اۋلادا وت جاعىپ، تاماق دايىنداعان 90-شى جىلدار ءالى ەسىمىزدە. سەبەبى جارىق تا، گاز دا بولماعان ەدى. ەلەكتر ەنەرگياسى الدەقاشان وركەنيەتتىڭ اجىراماس يگىلىگىنە اينالدى. سوندىقتان ونىڭ قاجەتتىلىگىن تالقىلاۋدىڭ دا كەرەگى جوق. بۇگىندە ەلىمىزدە جاستار سانى ءوسىپ، تۋۋ كورسەتكىشى ارتىپ كەلەدى، ال جۇمىس ورىندارى ءالى دە جەتىسپەيدى. ءبىز بالالارىمىزدىڭ جارقىن بولاشاعىن قامتاماسىز ەتۋىمىز كەرەك. اەس – بۇل ەرتەڭگى كۇنگە دەگەن سەنىم مەن جۇمىس بەرەتىن جوبا،" – دەدى ول.
سونىمەن قاتار، شتاب مۇشەلەرى كوكشەتاۋ قالاسىنداعى №2 ءورت ءسوندىرۋ ءبولىمىنىڭ ۇجىمىمەن دە كەزدەستى. دەپۋتاتتار ءورت سوندىرۋشىلەردىڭ ەرەن ەڭبەگىن ايرىقشا اتاپ ءوتتى:
"ءورت سوندىرۋشىلەر – زامانىمىزدىڭ زاڭعار باتىرلارى. ولار كۇن سايىن وزگەنى ويلاپ، ءوز ءومىرىن قاۋىپ-قاتەرگە تىگەتىن ەڭبەك ادامدارى. قۇتقارۋشىلاردىڭ ايتۋىنشا، اەس جاڭا مۇمكىندىكتەرگە جول اشىپ، قازاقستانعا ءوز پايداسىن تيگىزەدى."
بۇل كەزدەسۋلەر ەل بولاشاعى ءۇشىن ماڭىزدى شەشىم قابىلداۋدا حالىقتى ورتاق ماقساتقا بىرىكتىرۋگە جانە تۇسىنىستىك ورناتۋعا ىقپال ەتەدى.