قازاقستان رەسپۋبليكاسى پارلامەنتى سەناتىنىڭ دەپۋتاتى قايرات تاستەكەيەۆ بورودۋليحا اۋدانىنىڭ تۇرعىندارىمەن كەزدەسۋ وتكىزدى. كەزدەسۋدە اتوم ەلەكتر ستانسياسىن سالۋ ماسەلەسى تالقىلاندى. كەزدەسۋگە قاتىسۋشىلار دامىعان ەلدەردىڭ اتوم ەنەرگەتيكاسى سالاسىنداعى تاجىريبەسىمەن تانىسىپ، الداعى رەفەرەندۋمنىڭ ماڭىزدىلىعىنا ەرەكشە توقتالدى.
قايرات تاستەكەيەۆ اەس سالۋ – قازاقستاننىڭ ەنەرگەتيكالىق قاۋىپسىزدىگىن قامتاماسىز ەتۋدىڭ نەگىزگى قادامى ەكەنىن اتاپ ءوتتى. اتوم ەلەكتر ستانسياسى ەلىمىزدەگى ەلەكتر ەنەرگياسى تاپشىلىعىن ازايتىپ، تۇراقتى جانە سەنىمدى ەنەرگيامەن جابدىقتاۋدى قامتاماسىز ەتەدى، سونداي-اق ۇزاق مەرزىمدى ەكونوميكالىق پايدا اكەلەدى. سەناتور اتوم ەنەرگەتيكاسىن دامىتۋ جوعارى تەحنولوگيالىق شەشىمدەردى ەنگىزۋگە ىقپال ەتىپ، وتاندىق عىلىم مەن بىلىمگە دە وڭ اسەر ەتەتىنىن ەرەكشە اتاپ ءوتتى.
"اەس سالۋ – بۇل جاي عانا ستراتەگيالىق شەشىم ەمەس، بۇل بولاشاق ۇرپاق ءۇشىن قازاقستاننىڭ الداعى جىلدارعا تۇراقتى دامۋىن قامتاماسىز ەتەتىن ماڭىزدى قادام،" – دەپ اتاپ ءوتتى قايرات تاستەكەيەۆ.
كەزدەسۋ بارىسىندا ءوڭىردىڭ ەكونوميكالىق دامۋى جانە اتوم ەنەرگەتيكاسىنىڭ عىلىمدى قاجەت ەتەتىن تەحنولوگيالاردى جەدەل دامىتۋ جونىندەگى ماسەلەلەر تالقىلاندى. رەسپۋبليكالىق حالىق شتابىنىڭ مۇشەلەرى قازاقستاننىڭ ءاربىر ازاماتىنىڭ الداعى رەفەرەندۋمعا قاتىسۋى ەلدىڭ بولاشاعى ءۇشىن اسا ماڭىزدى ەكەنىن اتاپ ءوتتى. كەزدەسۋ بەلسەندى پىكىر الماسۋ تۇرىندە ءوتتى، وندا تۇرعىندار جوبانىڭ قاۋىپسىزدىگى مەن ەكولوگيالىق اسپەكتىلەرىنە قاتىستى سۇراقتارىن قويدى. بارلىق كوتەرىلگەن سۇراقتارعا تولىققاندى جاۋاپ بەرىلدى.