ەلدەگى اۋىل شارۋاشىلىعى تەحنيكاسىنىڭ 80 پايىزى توزىپ تۇر، جىل سايىن ونىڭ 8-10 پايىزىن جاڭارتىپ وتىرۋ قاجەت. بۇل تۋرالى پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىندا ايتتى
«اۋىل-ايماقتى دامىتۋ ءۇشىن شاعىن شارۋاشىلىقتاردى قولداۋ وتە ماڭىزدى. «اۋىل اماناتى» باعدارلاماسىنىڭ ەلگە قاجەت ەكەنى ايقىن كورىندى. ونىڭ كەلەسى كەزەڭىندە جەڭىلدەتىلگەن نەسيە بەرۋمەن شەكتەلىپ قالماۋ كەرەك. جەكە قوسالقى شارۋاشىلىق يەلەرى ءوزارا بىرىگۋى قاجەت. وسىعان قاجەتتى جاعداي جاسالۋعا ءتيىس»، - دەدى مەملەكەت باسشىسى.
پرەزيدەنت ماشينا-تراكتور پاركىنىڭ ابدەن ەسكىرىپ، توزۋى كۇردەلى ماسەلەگە اينالعانىن جەتكىزدى.
«ءقازىر اۋىل شارۋاشىلىعى تەحنيكاسىنىڭ 80 پايىزى توزىپ تۇر. سوندىقتان جىل سايىن ونىڭ 8-10 پايىزىن جاڭارتىپ وتىرۋ قاجەت. بۇل رەتتە ەلىمىزدەگى تەحنيكا وندىرۋشىلەر مەن شارۋالاردىڭ دا مۇددەسىن ەسكەرگەن ابزال. بۇگىندە جاھاندىق باسەكە كۇشەيىپ تۇر، تاۋار نارىعىندا وزگەرىس بار. مۇنداي جاعدايدا ءونىم وتكىزۋ ساياساتىنا ەرەكشە ءمان بەرۋىمىز كەرەك. جىلدار بويى قالىپتاسقان ىشكى جانە سىرتقى نارىقتاعى ورنىمىزدى ساقتاپ قالۋ ايرىقشا ماڭىزدى. ۇكىمەتتىڭ الدىندا سىرتقا شىعارىلاتىن ءونىم نارىعىنىڭ اۋقىمىن جوسپارلى تۇردە كەڭەيتۋ مىندەتى تۇر. قازاقستاننىڭ تاۋارلارىن شەتەلگە تانىتۋ جانە شىعارۋ ءۇشىن ءتيىستى شارالار قابىلداعان ءجون»، - دەيدى قاسىم-جومارت توقايەۆ.