پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا اتوم ەنەرگەتيكاسىن دامىتۋ ماسەلەلەرى بويىنشا قازاقستاندا اەس سالۋ يدەياسىنا قاتىستى ساراپشىلاردىڭ پىكىرلەرى تىڭدالدى، دەپ حابارلايدى aqshamnews.kz
«قازاقستاندىق اتوم ەلەكتر ستانسالارى» كومپانياسىنىڭ باسشىسى تيمۋر جانتيكيننىڭ ايتۋىنشا، بۇل ماسەلە ەلىمىزدە ەلەكتر ەنەرگياسىنىڭ بولجامدى تاپشىلىعى اياسىندا ءقاۋىپسىز ءارى ەكولوگيالىق اتوم ەنەرگياسىن دامىتۋ جونىندەگى مەملەكەت باسشىسىنىڭ تاپسىرماسى اياسىندا قارالۋدا.
«اتوم ەلەكتر ستانساسىن سالۋ ماسەلەسى توقسانىنشى جىلداردان بەرى قاراستىرىلىپ كەلەدى. ءقازىر ەنەرگيا تاپشىلىعى جانە جۇمىس ىستەپ تۇرعان قۋاتتاردىڭ توزۋ كورسەتكىشى ارتقان جاعدايدا ول قايتادان وزەكتى بولىپ وتىر. بۇل جەردە اتوم ەلەكتر ستانسالارى الەمدەگى ەڭ ءقاۋىپسىز ءارى ەڭ سەنىمدى ەنەرگيا كوزدەرىنە جاتاتىنىن اتاپ وتكەن ءجون»، — دەپ مالىمدەدى «قازاقستاندىق اتوم ەلەكتر ستانسالارى» كومپانياسىنىڭ باسشىسى.
جۇرگىزىلگەن زەرتتەۋلەردەن كەيىن III جانە III+ بۋىندارىنىڭ سۋ-سۋ رەاكتورلارى ەڭ قولايلى بولىپ تاڭدالدى. مۇنداي رەاكتورلاردا ءبىر-بىرىن بىرنەشە دۇركىن قايتالايتىن بەلسەندى جانە ءپاسسيۆتى قاۋىپسىزدىك جۇيەلەرى بار. ولار تەرەڭ ەشەلوندالعان اپاتقا قارسى قورعانىس دەپ اتالادى. قازىرگى رەاكتورلاردا شتاتتان تىس جاعدايدىڭ پايدا بولۋ ىقتيمالدىعى وتە تومەن. ءبىراق ونداي جاعدايدا دا قاۋىپسىزدىك جۇيەلەرى ونىڭ ىقتيمال سالدارىن بەيتاراپتاندىرادى.
بۇگىنگى تاڭدا ۇسىنىلعان 13 جوبانىڭ ىشىندە جۇڭگو، كورەيا، رەسەي جانە فرانسيادان 4 الەۋەتتى جەتكىزۋشى شورت-تىزىمگە ەنگىزىلگەن. سونىمەن قاتار جوبانىڭ شامامەن قۇنى جانە ونى سالۋ مەرزىمى تۋرالى تۇسىنىك قالىپتاستىرىلدى.
«وبەكتيۆتى شىندىق – قازاقستاننىڭ بولاشاعى اتوم ەنەرگەتيكاسىمەن تىعىز بايلانىستى»، — دەدى ت. جانتيكين.
رەفەرەندۋم قورىتىندىسى بويىنشا وڭ شەشىم قابىلدانعان جاعدايدا اتوم تەحنولوگياسىنىڭ ناقتى جەتكىزۋشىسىن تاڭداۋ جانە جوبانىڭ تەن-ىن بىرلەسىپ ازىرلەۋ كەلەسى ماڭىزدى مىندەت بولماق.