پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا قازاقستاندا اتوم ەنەرگەتيكاسىن دامىتۋ پەرسپەكتيۆالارى قارالدى، دەپ حابارلايدى aqshamnews.kz
• ەنەرگەتيكا ءمينيسترى الماسادام ساتقالييەۆ بايانداماسىندا ەل ەكونوميكاسىنىڭ تۇراقتى ءوسۋى ەلەكتر ەنەرگياسىنا سۇرانىستىڭ ارتۋىمەن قاتار جۇرەتىنىن اتاپ ءوتتى. ونەركاسىپ، مەتاللۋرگيا، كولىك، IT، فارماسيەۆتيكا، اۋىل شارۋاشىلىعى ونىمدەرىن قايتا وڭدەۋ جانە باسقا دا سەكتورلاردا جاڭا جوبالاردى ىسكە اسىرۋ ءۇشىن ءقازىردىڭ وزىندە ەلەكتر ەنەرگياسىنىڭ ەداۋىر كولەمى قاجەت.
«بۇل جوبالار جاڭا جۇمىس ورىندارىن قۇرۋعا، ەكونوميكالىق ءوسۋدى ىنتالاندىرۋعا جانە ازاماتتاردىڭ ءال-اۋقاتىن ارتتىرۋعا باعىتتالعان. الايدا ولاردىڭ دامۋى ەلدەگى ەنەرگيا قۋاتىنىڭ جەتىسپەۋشىلىگىمەن شەكتەلۋدە. ەگەر جاڭا تۇراقتى ەنەرگيا كوزدەرىن – جاڭارتىلاتىن، رەتتەۋشى جانە بازالىق قۋاتتاردى سالۋ بويىنشا شۇعىل شارالار قابىلدانباسا، جاعداي كۇردەلەنە ءتۇسۋى مۇمكىن»، — دەپ مالىمدەدى الماسادام ساتقالييەۆ.
بۇگىنگى تاڭدا ەلەكتر ەنەرگياسىن ءوندىرۋدىڭ نەگىزگى ۇلەسى ءوندىرىستىڭ 66%-ىن قامتاماسىز ەتەتىن كومىر ستانسالارىنا تيەسىلى. جەك سەكتورى ءوسىمدى كورسەتۋدە: نىساندار سانى 148-گە جەتتى، ءوندىرىس ۇلەسى شامامەن 6%.
ەنەرگەتيكا مينيسترلىگىنىڭ بولجامى بويىنشا 2035 جىلعا قاراي قازاقستاندا ەلەكتر ەنەرگياسىن تۇتىنۋ 152،4 ملرد كۆت/ساع دەيىن وسەدى. بۇل رەتتە ءبىرقاتار وبەكتيۆتى سەبەپتەر بويىنشا قولدانىستاعى ەنەرگيا كوزدەرىن ءوندىرۋ 135 ملرد كۆت/ساع-قا دەيىن تومەندەيدى. تاياۋداعى 10 جىلدا قازاقستانعا جيىنتىق قۋاتى 26،5 گۆت جاڭا ءوندىرۋشى قۋاتتاردى ەنگىزۋ قاجەت.
وسى باعىتتا ءتيىستى جۇمىستار جۇرگىزىلۋدە. جەكە ينۆەستيسيالار ەسەبىنەن جۇمىس ىستەپ تۇرعان ەلەكتر ستانسالارىن جاڭعىرتۋ جانە كەڭەيتۋ بويىنشا 22 ينۆەستيسيالىق كەلىسىم جاسالدى. ۇلىتاۋ، قىزىلوردا، تۇركىستان وبلىستارىندا، الماتىدا جالپى قۋاتى 3500 مۆت-تان اساتىن مانيەۆرلى گاز ەلەكتر ستانسالارىن سالۋ بويىنشا جوبالار پورتفەلى ىسكە اسىرىلۋدا. جاڭا جەو سالۋ بويىنشا شارالار قابىلداندى. سونىمەن قاتار ەكونوميكا مەن حالىقتىڭ ءوسۋىن ەسكەرە وتىرىپ، ەلەكتر ەنەرگياسىنىڭ بولاشاق تاپشىلىعىن قاناعاتتاندىرۋ ءۇشىن قولعا الىناتىن شارالار ءالى دە جەتكىلىكسىز. ءمينيستردىڭ ايتۋىنشا، الەمدىك تاجىريبە كورسەتكەندەي، اتوم ەلەكتر ستانساسىن سالۋ – شىعاتىن قۋاتتاردى اۋىستىرۋ جانە قازاقستاننىڭ ەنەرگياعا تاۋەلسىزدىگىن قامتاماسىز ەتۋ ءۇشىن جالعىز دۇرىس شەشىم سانالادى.