بۇگىن ماجىلىستەگى ۇكىمەت ساعاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ق ر الەۋمەتتىك كودەكسى جوباسىنىڭ نەگىزگى باعىتتارىن تانىستىردى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
مينيستر الەۋمەتتىك كودەكس جاڭا الەۋمەتتىك ساياساتتى قۇرۋعا نەگىز بولاتىنىن جانە ونىڭ باستى ماقساتى - قازاقستاندىق وتباسىنىڭ ءال-اۋقاتىن كوتەرۋ مەن نىعايتۋدىڭ بازالىق جاعدايىن قالىپتاستىرۋ ەكەنىن اتاپ ءوتتى. ونى جۇزەگە اسىرۋ ءۇشىن مەملەكەت، بيزنەس جانە ازاماتتار اراسىندا جاڭا الەۋمەتتىك كەلىسىمشارت جاساۋ قاراستىرىلادى.
«الەۋمەتتىك كودەكستى ازىرلەۋدە حالىقارالىق تاجىريبەلەر زەردەلەنىپ، ەلىمىزدىڭ ەرەكشەلىگىن ەسكەرە وتىرىپ، نەگىز رەتىندە ەۋروپالىق وداقتىڭ الەۋمەتتىك كودەكسى باسشىلىققا الىندى. كودەكستىڭ جوباسى 5 بولىمنەن، 19 تاراۋدان جانە 267 باپتان تۇرادى. ءبىرىنشى نوۆەللا – وتباسىنىڭ سيفرلىق كارتاسى (وسك). ول مەملەكەتتىك ورگانداردىڭ بارلىق قولدانىستاعى اقپاراتتىق جۇيەلەرىنىڭ دەرەكتەرى نەگىزىندە قالىپتاستىرىلادى»، - دەدى ت. دۇيسەنوۆا.
وسى ورايدا وندا 6،3 ملن قازاقستاندىق وتباسى نەمەسە 19،4 ملن ازامات تۋرالى اقپاراتتى قامتىلادى.
«بىرىككەن ۇلتتار ۇيىمىنىڭ دامۋ باعدارلاماسى ۇسىنعان الكيرە-فوستەر مودەلىن پايدالانا وتىرىپ، ءاربىر وتباسىنىڭ ءال-اۋقات دارەجەسىن انىقتادىق جانە ولاردى 5 ساناتقا بولدىك. ناتيجەسىندە، الەۋمەتتىك ساياسات ءىس-شارالارىنىڭ وتباسى ءال-اۋقاتىن كوتەرۋگە قانشالىقتى ىقپال ەتكەندىگىن، ياعني تيىمدىلىگىن باعالادىق. سونىمەن بىرگە وتباسىلارلارعا جانە ولاردىڭ مۇشەلەرىنە قانداي مەملەكەتتىك كومەكتىڭ ءتۇرى قاجەت ەكەنىن انىقتاۋعا مۇمكىندىك الدىق»، - دەدى مينيستر.
ۆەدومستۆو باسشىسى وسك مەملەكەتتىك الەۋمەتتىك ساياساتتىڭ ورتا جانە ۇزاق مەرزىمدى مىندەتتەرى مەن باعىتتارىن ايقىنداۋ قۇرالى بولاتىنىن اتاپ ءوتتى.
«بىرىنشىدەن، اتاۋلى كومەكتىڭ ءمانى وزگەرەدى. ەندى اتاۋلى كومەك وتباسىنى نەمەسە ازاماتتى قيىن ومىرلىك جاعدايدان شىعارا الاتىن اتاۋلى شارا رەتىندە قاراستىرىلاتىن بولادى. ەكىنشى وزگەرىس - قولدانىستاعى الەۋمەتتىك كونتراكتتىڭ جاڭا مازمۇنىنا قاتىستى، ياعني تاراپتاردىڭ جاۋاپكەرشىلىگىن ارتتىرۋ قارالىپ وتىر. مەملەكەت ناقتى ءبىر وتباسىنىڭ ءال-اۋقات دارەجەسىنە قاراپ، اتاۋلى شارا كورسەتۋگە مىندەتتى بولسا، ونى الۋشى وتباسى بۇل شارالاردى ومىرلىك قيىن جاعدايدان شىعۋ ءۇشىن ورىنداۋعا مىندەتتى»، - دەدى تامارا دۇيسەنوۆا.