اتام-اي، اتام!..

استانا مۋزەيى نازاربايەۆتىڭ بالاۋىز ءمۇسىنىن نەگە الىپ تاستادى؟

مۋزەي مالىمەتىنشە، كورمە زالىندا رەەكسپوزيسيا بويىنشا جۇمىستار جۇرگىزىلگەن، دەپ حابارلايدى Almaty-akshamy.kz

استاناداعى قازاقستان قارۋلى كۇشتەرىنىڭ مەملەكەتتىك اسكەري-تاريحي مۋزەيى تۇڭعىش پرەزيدەنت نۇرسۇلتان نازاربايەۆتىڭ التى جىل بۇرىن ورناتىلعان بالاۋىز ءمۇسىنىن نەگە الىپ تاستالعانىن ءتۇسىندىردى.

مۋزەي مالىمەتىنشە، كورمە زالىندا ساعادات نۇرماعامبەتوۆتىڭ تۋعانىنا 100 جىل تولۋىنا بايلانىستى رەەكسپوزيسيا (ەكسپوزيسيانى وزگەرتۋ جانە جاڭارتۋ – ەسك.) بويىنشا جۇمىستار جۇرگىزىلگەن.

"2024 جىلى قازاقستاننىڭ تۇڭعىش قورعانىس ءمينيسترى، كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆتىڭ تۋعانىنا 100 جىل تولۋىنا وراي "قازاقستان رەسپۋبليكاسىنىڭ قارۋلى كۇشتەرى" كورمە زالىندا ساعادات قوجاحمەت ۇلىنىڭ ءومىرى مەن اسكەري قىزمەتىن تولىق قامتۋ ماقساتىندا رەەكسپوزيسيا وتكىزىلدى"، - دەلىنگەن مۋزەيدىڭ مالىمەتىندە.

مۋزەيدەگى كورمە زالدارىن جوندەۋ الەمدىك تاجىريبە دەپ اتالدى.

ەسكە سالايىق، جاقىندا استاناداعى مۋزەيدەن نازاربايەۆتىڭ بالاۋىز ءمۇسىنىنىڭ الىپ تاستالعانى بەلگىلى بولدى. ول 2018 جىلى قويىلعان.