الماتىدا 30 جاس قىزمەتكەر لەيتەنانت شەنىن الدى.
سالتاناتتى تابىستاۋ ءراسىمى قازاقستان رەسپۋبليكاسى مەملەكەتتىك ورتالىق مۇراجايىنىڭ الاڭىندا ءوتتى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بۇگىنگى كۇن – ءارقايسىڭىز ءۇشىن ءومىر بويى ەستە قالاتىن ماڭىزدى وقيعا. سىزدەر العاشقى وفيسەرلىك شەندى الاسىزدار. مەنەن باستاپ، وسى شاراعا قاتىسقان ءاربىر قىزمەتكەر دە قىزمەت باسىنداعى وسى ءساتتى ەستەرىنە الادى. ازاماتتاردىڭ قۇقىقتارى مەن بوستاندىقتارىن قورعاپ، قوعامنىڭ سەنىمىن اقتايتىن دا سىزدەر! ءاربىر ازامات، ونىڭ ىشىندە جاقىندارىڭىز ءوزىن تولىق ءقاۋىپسىز سەزىنۋى ءۇشىن ىشكى ىستەر ورگاندارىنىڭ بەدەلىن ارتتىرۋعا جانە قالاداعى قاۋىپسىزدىكتى قامتاماسىز ەتۋگە ءارقايسىڭىز ءوز ۇلەسىڭىزدى قوسۋىڭىز كەرەك. ءبىر قىزىعى، شەندەردى تاپسىرۋ ءراسىمى ماڭىزدى تاريحي قۇجاتتار مەن كورمەلەر ساقتالعان ەلىمىزدىڭ مەملەكەتتىك ورتالىق مۇراجايىندا ءوتىپ جاتىر. سىزدەر تاريحتا قالۋلارىڭىز قاجەت. سىزدەرگە، قۇرمەتتى ارىپتەستەر، تابىستى قىزمەت تىلەيمىن. وتباسىلارىڭىزدا قۇت-بەرەكە بولسىن»، – دەدى الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.