ادام بالاسىنىڭ ءومىر ءسۇرۋى بەلگىلى ءبىر زاڭدىلىققا باعىناتىنى سەكىلدى، الەمدى مەكەن ەتكەن كەز كەلگەن مەملەكەتتىڭ دە نەگىزگى زاڭى بولۋى شارت. ول زاڭنىڭ بارلىق ەلدەگى مويىندالعان اتاۋى – كونستيتۋسيا. كونستيتۋسيا – مەملەكەتتىڭ ءتولقۇجاتى، تاۋەلسىزدىگىمىزدىڭ ەڭ باستى تىرەگى، بەيبىتشىلىك پەن تاتۋلىقتىڭ ەڭ باستى تەتىگى. بيىل ازات ەلدىڭ ايبارى بولعان اتا زاڭىمىزعا – 26 جىل!
وسى ورايدا اتا زاڭىمىز تۋرالى قىزىقتى مالىمەتتەردى نازارعا ۇسىنىپ وتىرمىز. ەلىمىزدىڭ باستى زاڭىن تولىق وقىماعان بولساڭىز، بۇل سىزگە تاپتىرمايتىن اقپارات بولماق.
- 1995 جىلى كونستيتۋسيا جوباسىن تالقىلاۋعا ءۇش ميلليوننان استام قازاقستان ازاماتى جۇمىلدىرىلعان.
- ق ر كونستيتۋسياسى قابىلدانعاننان كەيىن نەبارى ءۇش-اق رەت وزگەرتۋلەر مەن تولىقتىرۋلار ەنگىزىلدى. ول – 1998، 2007 جانە 2011 جىلدار.
- تاۋەلسىزدىكتىڭ 10 جىلدىق، 15 جىلدىق، 20 جىلدىق مەرەيتويلارى قۇرمەتىنە ارنايى پوشتا ماركالارى جارىق كوردى. 2005 جىلى 10 جىلدىق قۇرمەتىنە 72 تەڭگەلىك نومينالدى ماركا، 2010 جىلى 15 جىلدىققا، 2015 جىلى 20 جىل تولۋىنا وراي پوشتالىق ماركا شىعارىلدى.
- اتا زاڭ ءماتىنىنىڭ ورىسشا نۇسقاسىنا (7168 ءسوز) قاراعاندا، قازاق تىلىندەگى نۇسقاسىندا (8904) ءسوز كوپ. ونىڭ ىشىندە «جانە» ءسوزى ءجيى قايتالانادى ەكەن. زاڭدا بۇل ءسوز 224 رەت كەزدەسەدى. ال «رەسپۋبليكا» ءسوزى 126 رەت (ورىسشاسىندا 305)، «قازاقستان» ءسوزى 111 رەت، «پارلامەنت» ءسوزى 82 رەت، «باپ» ءسوزى 100 رەت قايتالانادى.
- كونستيتۋسياداعى ەڭ كوپ باپ قاراستىرىلعان ءبولىم – «پارلامەنت» (61 باپ)، ال ەڭ از باپ «ادام جانە ازامات» (39 باپ) بولىمىنە تيەسىلى.
- قازاقستاننىڭ العاشقى كونستيتۋسياسى 1926 جىلى 18 اقپاندا كسرو قۇرىلعاننان كەيىن جانە ءرسفسر-دىڭ 1925 جىلعى كونستيتۋسياسىن ەسكەرە وتىرىپ، قازاق اسسر ورتالىق اتقارۋ كوميتەتىنىڭ قاۋلىسىمەن تۇپكىلىكتى رەداكسيادا قابىلدانعان. وسى نەگىزگى زاڭ باسقارۋ نىسانىن، مەملەكەتتىك قۇرىلىستى، ساياسي رەجيمدى، مەملەكەتتىك بيلىك ورگاندارىنىڭ، اتقارۋشى شەشۋشى ورگانداردىڭ قۇرىلىمىن بەكىتتى. كونستيتۋسياعا سايكەس، قازاقستان رسفسر قۇرامىنداعى تەڭ قۇقىقتى رەسپۋبليكا بولدى.
- كونستيتۋسيا كۇنىنىڭ قۇرمەتىنە 2014 جىلى ەلوردادا ەڭ ۇزىن «يتاليا پيروگى» ءپىسىرىلدى. ول جوسپارداعىداي 15 مەتر بولىپ شىقپاعانىمەن، 5 مەترگە جەتىپ، رەكورد ورناتتى. بۇل پيروگتان قالاداعى كونستيتۋسياعا بايلانىستى سۇراقتارعا جاۋاپ بەرگەن تۇرعىندار ءدام تاتتى.
- كونستيتۋسيانىڭ باسپالىق نۇسقاسىنىڭ 30-دان استام ءتۇرى بار. ونىڭ ەڭ قاراپايىم، جۇمساق مۇقابالى ءتۇرىن 200–500 تەڭگەگە ساتىپ الۋعا بولادى. ونىڭ وتە قىمبات تۇراتىن تۇرلەرى دە بار.
ينتەرنەت ارقىلى وتكىزىلگەن ءباسساۋدادا كونستيتۋسيانىڭ ەڭ قىمبات نۇسقاسى 130 مىڭ تەڭگەگە ساتىلدى، وندا پرەزيدەنتتىڭ قولتاڭباسى بولعان.