ەلىمىزدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مادەنيەت، ءبىلىم بەرۋ، وتباسى جانە مەملەكەتتىك باقىلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ نەگىزىندە جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ قۇقىقتارىن قورعاۋ تەتىكتەرىن كۇشەيتۋگە باعىتتالعان ماڭىزدى وزگەرىستەر قابىلداندى، - دەپ حابارلايدى Aqshamnews.kz.
بۇعان دەيىن 2024 جىلى بالالاردىڭ قۇقىقتارىن قورعاۋ سالاسىندا التى ماڭىزدى زاڭ قابىلدانىپ، بالالارعا قاتىستى كەز كەلگەن زورلىق-زومبىلىق ءۇشىن جاۋاپكەرشىلىكتى كۇشەيتۋگە، بالالار ساۋداسىنىڭ الدىن الۋعا باعىتتالعان قۇقىقتىق تەتىكتەردى زاڭنامالىق دەڭگەيدە بەكىتتى. جاڭا زاڭننىڭ قابىلدانۋى بالالاردى قۇقىقتىق قورعاۋدى قامتاماسىز ەتۋ شارالارىنىڭ جۇيەلى جالعاسى بولدى.
ەندى جەتىم جانە اتا-انىسىنىڭ قاراۋىنسىز قالعان بالالاردى اسىراپ الۋ نەمەسە قامقورشىلىققا بەرۋ كەزىندە ولاردىڭ تۋعان-تۋىستارىنا باسىمدىق بەرىلەدى. ەگەر جاقىن تۋىستارى تابىلماسا، بالا زاڭدى نەكەدە تۇرعان وتباسىنا ورنالاستىرىلادى. سونىمەن بىرگە بالا اسىراۋشى وتباسىندا بولعان كەزەڭدە ونىڭ زاڭدى وكىلىنىڭ سوتقا تارتىلۋى نەمەسە پسيحونيەۆرولوگيالىق نەمەسە ناركولوگيالىق ديسپانسەردە ەسەپكە الىنۋى قامقورشىلىق مىندەتىنەن دەرەۋ شەتتەتۋگە نەگىز بولادى. بۇل نورما بالانىڭ ءومىرى مەن دەنساۋلىعىنا ءقاۋىپ ءتوندىرۋى مۇمكىن جاعدايلاردىڭ الدىن الۋعا باعىتتالعان.
سونىمەن قاتار ۇستىنەن قىلمىستىق قۋدالاۋ جۇرگىزىلىپ جاتقان ازاماتتارعا بالا اسىراپ الۋعا، قامقورشىلىق جاساۋعا نەمەسە پاتروناتتىق تاربيەگە قاتىسۋعا تىيىم سالىنادى.
بۇدان بولەك، قامقورشىلار، قورعانشىلار، پاترونات تاربيەشىلەر جانە اسىراپ الۋشىلار ەندى جىل سايىن دەنساۋلىعى، تابىس كوزى، تۇرمىستىق جاعدايى جانە سوتتىلىعىنىڭ جوق ەكەنى تۋرالى مالىمەتتەردى تاپسىرىپ، وزدەرىنىڭ سەنىمدىلىگىن راستاۋى ءتيىس.
جاڭا نورمالار جەتىم جانە اتا-اناسىنىڭ قامقورلىعىنسىز قالعان بالالاردى قورعاۋ جۇيەسىن كۇشەيتىپ، ولاردى وتباسىندا تاربيەلەۋ جاعدايلارىن تۇراقتى باقىلاۋدىڭ تيىمدىلىگىن ارتتىرۋعا، ىقتيمال قاۋىپتەردىڭ الدىن الۋعا مۇمكىندىك بەرەدى.