قازاقتىڭ ەرتەدەن كەلە جاتقان جاقسى داستۇرلەرىنىڭ ءبىرى وسى – قۇرىلتاي شاقىرۋ.
مۇنداي القالى جيىندا اتا-بابالارىمىز ەڭ ماڭىزدى ماسەلەلەرىن تالقىعا سالىپ، داۋدىڭ دا، جاۋدىڭ دا ماسەلەسىن شەشكەن. قۇرىلتايدىڭ ماڭىزدىلىعى دا وسىندا. سول ۇلىق ءداستۇردىڭ قايتادان جاڭعىرىپ جاتقانىن ەستىگەندە قاتتى قۋاندىم. ءوز باسىم مەملەكەت باسشىسى قاسىم-جومارت توقايەۆتىڭ وزگەدەن ەرەكشە بولىپ وتىرعانى دا وسى قازاقتىڭ بۇرىننان كەلە جاتقان باستامالارىن جالعاستىرىپ وتىرعانىندا دەر ەدىم. مەنىڭ قازاعىم: «كەلەلى ءىستى كوپپەن شەش، شيەلەنىستى ەپپەن شەش» دەيدى. ەلىمىزدە وتكەن ەكى قۇرىلتايدا دا كوپتەگەن جاقسى باستامالار كوتەرىلىپ، ءقازىر ولار جالعاسىن تاۋىپ جاتىر. ۇلىتاۋدا وتكەن العاشقى قۇرىلتايدا 25 قازان - رەسپۋبليكا كۇنىنە قايتادان مەملەكەتتىك مارتە بەرىلدى. بۇل - بارشامىز ءۇشىن ماڭىزدى شەشىم. ويتكەنى، سوناۋ 1990 جىلدىڭ 25 قازانىندا قازاقستاننىڭ ەگەمەندىگى تۋرالى قابىلدانعان دەكلاراسيا تاۋەلسىزدىككە باستالعان العاشقى قادام ەدى. تاعى ءبىر ەرەكشەلىك، قۇرىلتايدىڭ ءار ايماقتا وتۋىندە بولىپ وتىر. مۇنىڭ ءوزى قۇرىلتاي وتكەن ءوڭىردىڭ دامۋىنا سەرپىن بەرەدى دەگەن ءسوز. العاشقى جيىن ۇلىلاردىڭ تابانىنىڭ ءىزى قالعان ۇلىتاۋدا وتسە، ەكىنشى قۇرىلتاي بارشا تۇرىكتىڭ ورداسى بولعان تۇركىستاندا ءوتتى. ءۇشىنشى باسقوسۋ جايىقتىڭ جاعاسىندا اتىراۋدا باستالدى. جالپى، وتكىزىلىپ جاتقان بارلىق القالى جيىننىڭ ايتارى بىرەۋ - ەلىمىزدە بەيبىتشىلىك پەن تۇراقتىلىق بولۋى كەرەك. ونسىز مەملەكەتتىڭ وسىپ-وركەندەۋى مۇمكىن ەمەس. سوندىقتان، ەل بىرلىگى باستى ماقسات ەكەنى بەلگىلى. وسىناۋ كۇردەلى كەزەڭدە ەلدىڭ باسىن بىرىكتىرىپ، قيىندىقتىڭ بارلىعىن ىنتىماقتىڭ ارقاسىندا ەڭسەرە بەرەيىك!