«ازاماتتارعا ارنالعان ۇكىمەتتەگى» ءتورت اي ىشىندە 111 بايلانىس ورتالىعى 9 مىڭعا جۋىق قوڭىراۋ قابىلداعان.
ونىڭ 500-گە جۋىعى زورلىق پەن قاتىگەزدىك جايىندا جانە ونىڭ كوبى بالالارعا قاتىستى بولعان، دەپ حابارلايدى اlmaty-akshamy.kz.
ازاماتتاردىڭ ەڭ كوپ ساۋالدارى زاڭگەرلىك كەڭەس، الەۋمەتتىك قورعاۋ، ءبىلىم بەرۋ سالاسى، دەنساۋلىق ساقتاۋ سالاسىنا قاتىستى.
111 قىزمەتى مەن جاعدايعا بەيجاي قاراي المايتىن ازاماتتاردىڭ كومەگىمەن سوڭعى ايلاردا بىرنەشە قيىن جاعدايلار شەشىلدى: مۇگەدەك قىزدىڭ مەكتەپتەگى زورلىق-زومبىلىقپەن كۇرەسۋىنە كومەك بەرىلدى، ەر ادام قۇلدىقتان قۇتقارىلدى، اكىمدىكتىڭ قولداۋىمەن از قامتىلعان وتباسىنا ورتتەن كەيىن تۇرعىن ءۇيى قالپىنا كەلدى، جالعىزباستى قارت اكەنىڭ ۇلىن سيرككە اپارۋ ارقىلى ارمانى ورىندالدى، سونىمەن قاتار، وقۋشى بالاعا كۇندەلىكتى مەكتەپكە قاتىناۋى ءۇشىن جول ءجۇرۋ كارتاسىن الۋعا كومەك كورسەتىلدى. 111 قىزمەتىنىڭ كەڭەسشىلەرى ءاربىر قوڭىراۋدى جەكە ماسەلە رەتىندە ەمەس، بەلگىلى ءبىر وتباسىنىڭ بىرنەشە ماسەلەلەرىن شەشۋ مۇمكىندىگى رەتىندە قاراستىرادى، دەپ جازىلعان ۆەدومستۆو حابارلاماسىندا.
111 قىزمەتىنە ءجيى جۇگىنەتىن 30 بەن 44 جاس ارالىعىنداعى ايەلدەر بولىپ تابىلادى – ولاردىڭ قوڭىراۋلارى 60% قۇرايدى. بۇل بالا قۇقىعىن قورعاپ، وتباسىنداعى وزبىرلىققا قارسى كۇرەسەتىن ەڭ بەلسەندى قوعامدىق توبى.
بايلانىس ورتالىعىنىڭ زاڭگەرلەرى مەن پسيحولوگتارى حابارلاسقان ءاربىر ادامعا ماسەلەسى شەشىلگەنشە قولداۋ كورسەتىپ، كەڭەس بەرەدى، قاجەت بولعان جاعدايدا قۇقىق قورعاۋ ورگاندارىنا اقپارات بەرەدى.
وتباسى، ايەلدەر جانە بالالاردىڭ قۇقىقتارىن قورعاۋداعى 111 قىزمەتى 2023 جىلدىڭ 16 قازانىنان باستاپ «ازاماتتارعا ارنالعان ۇكىمەت» مەملەكەتتىك كورپوراسياسىنا بەرىلگەن بولاتىن. 111 نومىرىنە تاۋلىك بويى قوڭىراۋ شالۋعا بولادى، انونيمدىك جانە جەكە دەرەكتەردىڭ قورعالۋىنا كەپىلدىك بەرىلەدى. بايلانىس ورتالىعى قۇقىق قورعاۋ ورگاندارىمەن تۇراقتى بايلانىستا، بارلىق قوڭىراۋلاردى تىركەپ، داعدارىس شەشىلگەنشە ءاربىر وتباسىنىڭ جاعدايىن باقىلايدى.