«قازاقستاندىق اتوم ەلەكتر ستانسيالارى» ج ش س اتوم ەنەرگەتيكاسى ءبولىمىنىڭ جەتەكشى ينجەنەرى اسۋان سيابەكوۆ استانا قالاسىنىڭ كاسىپوداق قىزمەتكەرلەرىمەن كەزدەسۋ وتكىزدى. كەزدەسۋ بارىسىندا ا. سيابەكوۆ ەلىمىزدىڭ ەنەرگوجۇيەسىنىڭ قازىرگى جاعدايى مەن اەس سالۋدىڭ قاجەتتىلىگى تۋرالى ەگجەي-تەگجەيلى بايانداپ، ەلەكتر ەنەرگياسىنا دەگەن سۇرانىستىڭ ارتۋى مەن ەسكىرگەن ينفراقۇرىلىمنىڭ ماسەلەلەرىن اتاپ ءوتتى. ونىڭ ايتۋىنشا، قازاقستانداعى جىلۋ ەلەكتر ستانسيالارىنىڭ 70-80%-ى توزعان، ال كەيبىر قالالاردا بۇل كورسەتكىش 90%-عا دەيىن جەتىپ وتىر. مۇنداي جاعداي ەلەكتر قۋاتىن وندىرۋدە تۇراقتىلىقتىڭ تومەندەۋىنە، ۇزىلىستەر مەن اپاتتىق جاعدايلاردىڭ كوبەيۋىنە اكەلۋى مۇمكىن.
– ەكىباستۇز جانە ريددەر قالالارىنداعى قازاندىقتارداعى اقاۋلار بۇل ماسەلەنىڭ ايقىن دالەلى بولىپ وتىر. جىلۋ ەلەكتر ستانسيالارىنىڭ توزۋ دەڭگەيى مەن تۇتىنۋشىلار سانىنىڭ ارتۋىنا بايلانىستى، ەلىمىزگە جاڭا ەنەرگيا كوزدەرىن شۇعىل تۇردە ەنگىزۋ قاجەت، – دەپ اتاپ ءوتتى اسۋان سيابەكوۆ.
سونىمەن قاتار، ول اتوم ەنەرگەتيكاسى جاڭارتىلاتىن ەنەرگيا كوزدەرىمەن سالىستىرعاندا تۇراقتى ءارى سەنىمدى ەكەنىن ايتتى. كۇن مەن جەل ەنەرگياسى اۋا رايىنا تاۋەلدى بولسا، اەس ۇزدىكسىز جۇمىس ىستەپ، قاجەتتى ەنەرگيا كولەمىن تۇراقتى تۇردە وندىرە الادى.
– اەس سالۋ تەك ەنەرگەتيكالىق قاۋىپسىزدىكتى قامتاماسىز ەتىپ قانا قويماي، ەكولوگيانى جاقسارتۋعا دا ايتارلىقتاي ۇلەس قوسادى. اتوم ەنەرگياسى كومىر مەن گاز سياقتى ءداستۇرلى كوزدەرگە قاراعاندا الدەقايدا تازا ءارى ءتيىمدى. بۇل قازاقستاننىڭ "جاسىل" ەكونوميكاعا كوشۋىنە ىقپال ەتەدى، – دەدى اسۋان سيابەكوۆ.
سيابەكوۆ سونداي-اق، قازاقستاننىڭ ۋران قورىنىڭ مولدىعى اەس سالۋدىڭ ەكونوميكالىق تۇرعىدان تيىمدىلىگىن ارتتىراتىنىن اتاپ ءوتتى. ۋراننىڭ قازاقستانداعى مول قورى ەلدىڭ ەنەرگيا سالاسىن دامىتىپ قانا قويماي، ەنەرگەتيكالىق تاۋەلسىزدىكتى قامتاماسىز ەتۋگە مۇمكىندىك بەرەدى.
– قازاقستان الەمدەگى ۋران ءوندىرىسى بويىنشا كوش باستاپ كەلەدى، جانە بىزدە اەس ءۇشىن قاجەتتى شيكىزات تا بار. ونى ءتيىمدى پايدالانىپ، ەلىمىزدىڭ ەنەرگەتيكالىق الەۋەتىن تولىق ىسكە اسىرۋىمىز كەرەك، – دەپ تۇيىندەدى ول.