بۇل ماسەلە قازاقستان ۇكىمەتىنىڭ ەرەكشە باقىلاۋىندا.
جامبىل وبلىسى اۋماعىندا ترانسشەكارالىق وزەندەر بويىندا سۋ قويماسىن سالۋ ماسەلەسى ۇكىمەتتىڭ ەرەكشە باقىلاۋىندا. بۇل جايىندا ق ر پرەمەر-مينيسترى ءاليحان سمايىلوۆتىڭ سەنات دەپۋتاتتارىنىڭ ساۋالىنا بەرگەن جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جامبىل وبلىسى اۋماعىندا ترانسشەكارالىق وزەندەر بويىندا سۋ قويمالارىن سالۋ قاجەتتىگى («اقمولا»، «قالعۇتى»، «ىرعايتى») - سۋدى ۇنەمدى پايدالانۋ ەسەبىنەن ونىمدىلىكتى ارتتىرۋ جونىندەگى ستراتەگيالىق مىندەتتى ىسكە اسىرۋداعى 2021-2025 جىلدارعا ارنالعان «جاسىل قازاقستان» ۇلتتىق جوباسى ءىس-شارالارىنىڭ ءبىرى. جوبا بويىنشا 2022 جىلعا ارنالعان رەسپۋبليكالىق بيۋدجەتتى ناقتىلاۋ اياسىندا جوبالىق-سمەتالىق قۇجاتتاماسىن ازىرلەۋگە 243،4 ملن تەڭگە سوماسىنا ءتيىستى بيۋدجەتتىك ءوتىنىم قارالىپ جاتىر»، - دەپ اتاپ وتەدى ۇكىمەت باسشىسى.
ونىڭ ايتۋىنشا، جوعارىدا كورسەتىلگەن جوبالاردى ىسكە اسىرۋ وڭىردەگى اۋىل شارۋاشىلىعى داقىلدارىنىڭ ونىمدىلىگىن ارتتىرۋعا جانە تۇتاستاي العاندا ازىق-تۇلىك قاۋىپسىزدىگىن قامتاماسىز ەتۋگە باعىتتالعانىن ەسكەرە وتىرىپ، مالىمدەلگەن شىعىستار بيۋدجەت زاڭناماسىنىڭ تالاپتارىنا سايكەس باسىم تارتىپپەن قارالادى.
«جالپى، جامبىل وبلىسى اۋماعىندا ترانسشەكارالىق وزەندەر بويىندا سۋ قويماسىن سالۋ ماسەلەسى ۇكىمەتتىڭ ەرەكشە باقىلاۋىندا»، - دەدى ءاليحان سمايىلوۆ.