الماتىدا اتى اڭىزعا اينالعان A’Studio توبىنىڭ اندەرى جەلىسىمەن تۇسىرىلگەن «توقتا، ءتۇن!» كينوميۋزيكلىنىڭ (رەجيسسەرى فارحات شاريپوۆ) تانىستىرىلىمى ءوتتى. ونىڭ العاشقى كورەرمەندەرى ب ا ق وكىلدەرى بولدى.
...بەيبىت ەسىمدى جاس مۋزىكانت تابىستى ارتيست بولۋ ارماندايدى. ەڭبەكقور جىگىت ءوزىنىڭ «ديگيداي» توبىمەن بىرگە ساحنانى ءساتتى باعىندىرىپ، ءتيىمدى كەلىسىمشارتتارعا قول جەتكىزە باستايدى. جۇرەگى ماحابباتقا، قۋانىشقا، امبيسياعا تولى جىگىت سۇيگەن قىزى المامەن باس قۇراپ، ومىرگە ءسابي كەلىپ، باقىتتى ساتتەرى ەسەلەنە تۇسەدى. ءومىر جولىندا دجۋليا ەسىمدى ادەمى ءبيشى قىز پايدا بولعانعا دەيىن ونىڭ كۇندەرى وسىلاي ءورىلىپ جاتقان-دى.
الما جورگەكتەگى بالامەن ۇيدە، كۇيكى تىرلىكتىڭ اۋزىنا جۇتىلىپ كەتە بارادى، ال قىزىلدى-جاسىلدى الەمگە، اۋەنگە قۇمار سەزىمتال جىگىت قىزىقتى سىرتتان ىزدەپ، ءوزىن ۇناتىپ قالعان دجۋلياعا كوڭىل بۇرادى. شاڭىراعىنا تاڭ اتا ورالۋدى، ءتىپتى كەيدە كەلمەي قالۋدى شىعارادى.
كۇندەردىڭ كۇنىندە بەيبىتتىڭ جانىندا جارى دا، دوستارى دا قالمايدى. ءيا، ماحاببات، دوستىق، ادالدىق، اتا-اناعا، اينالاعا قۇرمەت سىندى قۇندىلىقتار كينودا ونەر تىلىمەن، مۋزىكا اۋەندەرىمەن مىڭ قۇبىلا سۋرەتتەلەدى.
***
«توقتا، ءتۇن!» ءفيلمى جاقىن جاندار اراسىنداعى وسىنداي كۇردەلى قارىم-قاتىناستاردان بولەك، ارۋ الماتىعا دەگەن سۇيىسپەنشىلىكتى، ونىڭ جارىق تا كەڭ كوشەلەرىنىڭ ادەمىلىگىن دە بەرە بىلگەن. كارتينا سونىسىمەن قۇندى شىققان سەكىلدى.
«توقتا، ءتۇن!» A’Studio توبىنىڭ اندەرى جەلىسىمەن تۇسىرىلگەنىمەن، سيۋجەتى مۋزىكالىق توپپەن مۇلدەم بايلانىستى ەمەس. ايتپاقشى، بيىل «توقتا، ءتۇن!» ءانىنىڭ جارىققا شىققانىنا 30 جىل تولادى. بۇگىنگى كينوميۋزيكلگە پايدالانىلعان بۇل ساۋندترەك العاش رەت 1994 جىلى ورىندالعان. الداعى ۋاقىتتا اتاۋلى كۇندى ەرەكشە اتاپ ءوتۋ دە جوسپارلانىپ وتىرعان سەكىلدى.
***
كەمەڭگەر ورال (كينودا بەيبىت)، قارلىعاش ەرمەكوۆا (الما)، جاسمين نۇراحمەت (دجۋليا) سىندى جاس اكتەرلار ويناعان كورسەتىلىم بىتكەن سوڭ، جۋرناليستەرگە ارنالىپ باسپا ءسوز ءماسليحاتى دا ۇيىمداستىرىلدى. وندا جاس اكتەرلارمەن بىرگە، كينوميۋزيكلدىڭ پروديۋسەرلەرى بايعالي سەركەبايەۆ پەن دينا جۇمابەك تە بولىپ، ب ا ق وكىلدەرىنىڭ ساۋالدارىنا جاۋاپ بەردى. ولار كينوكارتينادا نەگىزگى وقيعالاردى بەينەلەۋگە A’Studio توبىنىڭ 17 ءانى ۇسىنىلعانىن اتاپ ءوتتى. ميۋزيكلدە تىڭدارمانداردىڭ سۇيىكتى حيتتەرىنە اينالعان «ستوپ، نوچ!»، «سولدات ليۋبۆي»، «گرەشنايا ستراست»، «تيك-تاك»، «ەششە ليۋبليۋ» جانە «دجۋليا» سياقتى باسقا دا اندەر ورىندالادى. كورەرمەنگە توسىنسىي رەتىندە توپتىڭ سوناۋ «الماتى» اتالعان كەزدەگى العاشقى البومىنداعى قازاقشا اندەرى دە شىرقالادى. فيلم ميۋزيكل جانرىندا بولعاندىقتان، ول ديناميكا مەن ەنەرگيا بەرەتىن ەڭ جارقىن مۋزىكالىق قويىلىمدارعا تولى بولدى، سونداي-اق وعان ءارتۇرلى ستيلدەگى 500-دەن استام ءبيشى قاتىسقان.
***
پروديۋسەرلەر باستى كەيىپكەردى كىم وينايتىنىن ۇزاق ۋاقىت بويى شەشە الماعاندارىن دا اتاپ ءوتتى. كەمەنگەر ورال بۇل رولگە بەكىتىلگەنگە دەيىن كوپ كۇش جۇمساعان. ول ۆوكالمەن اينالىسىپ، ديكسياسىن رەتتەۋ ءۇشىن ارنايى ساباق الۋعا ءماجبۇر بولعان. پروديۋسەر دينا جۇمابەك كەمەڭگەردى تالانتىنا، ەڭبەكقورلىعىنا، جانكەشتىلىگىنە كوز جەتكىزىپ بارىپ تاڭداعاندارىن ايتتى.
بەيبىت رولىنە ارنالعان ۆوكالدىق پارتيالاردى كارتينادا ءانشى ءمادي سىزدىقوۆ ورىنداعان، ءبىراق كەيبىر اندەردى باس كەيىپكەر كەمەنگەردىڭ ءوزى دە شىرقايدى. ءتىپتى ەكەۋىنىڭ داۋىسىندا ۇقساستىق بولعان ەكەن.
«مەن بۇرىن مۇنداي ميۋزيكل جانرىندا ويناعان ەمەسپىن. قالاي شىعار ەكەن دەپ قاتتى ۋايىمدادىم. ءبىراق وسى جانردا باعىمدى سىناۋدى ستۋدەنت شاعىمنان ارمانداۋشى ەدىم. ۆوكالدان باسقا، حورەوگرافيالىق نومىرلەردە دە كوپ جۇمىس ىستەۋىمە تۋرا كەلدى. تورەلىگىن كورەرمەندەر بەرە جاتار»، – دەدى باستى كەيىپكەردى سومداعان كەمەڭگەر ورال.
ءيا، ەندىگى ءسوزدى كينوسۇيەر كورەرمەندەرگە قالدىرامىز.