استانالىق قۇتقارۋشى قايتىس بولعان تۇرعىن ۇيدەگى ءورتتىڭ نەدەن شىققانى انىقتالدى

ءورتتىڭ سەبەپتەرى تۇرعىنداردىڭ ءورت قاۋىپسىزدىگىنىڭ قاراپايىم تالاپتارىن ساقتاماۋ بولىپ تابىلادى

قۇتقارۋشى اسقار زابيكۋلين قايتىس بولعان تۇرعىن ۇيدەگى ءورتتىڭ نەدەن شىققانى انىقتالدى، دەپ حابارلايدى Almaty-akshamy.kz استانا قالاسى تجد باسپا ءسوز قىزمەتىنە سىلتەمە جاساپ.

انىقتالعانىنداي، «قاھارمان» تۇرعىن ءۇي كەشەنىندە (باۋىرجان مومىش ۇلى داڭعىلى، 14) بولعان ءورتتىڭ شىعۋ سەبەبى – ەلەكتر سىمدارىنىڭ قىسقا تۇيىقتالۋىنا اكەپ سوقتىرعان ۇزارتقىش جەلىسىندەگى اقاۋلىق.

ەسكە سالساق، 16 قاراشادا استانادا كوپقاباتتى ۇيدەن ءورت شىعىپ، 3 ادام اۋرۋحاناعا تۇسكەن ەدى.

وسى وقيعادا دەنەسىنىڭ 80 پايىزىن كۇيىك شالعان ءورت ءسوندىرۋشى اسقار زابيكۋلين اۋرۋحانادا جان تاپسىردى.

مينيسترلىك تاراتقان مالىمەتكە سايكەس، بيىل ەلوردا اۋماعىندا 682 ءورت تىركەلگەن، ونىڭ 105ء-ى كوپپاتەرلى تۇرعىن ۇيلەردە. ادەتتە، ءورتتىڭ سەبەپتەرى تۇرعىنداردىڭ ءورت قاۋىپسىزدىگىنىڭ قاراپايىم تالاپتارىن ساقتاماۋ بولىپ تابىلادى.

استانا قالاسىنىڭ تجد ەلەكتر جەلىلەرىن، روزەتكالاردى اقاۋسىز كۇيدە ۇستاۋعا، جەلىلىك سۇزگىلەردى جانە باسقا دا ەلەكتر قۇرالدارىن جارامسىز كۇيدە پايدالانۋعا جول بەرمەۋگە ەرەكشە نازار اۋدارۋدى ەسكە سالادى.