2020-2022 جىلدار ارالىعىندا جارىققا شىققان كىتاپتار اراسىنداعى بايقاۋدىڭ جەڭىمپازدارى ماراپاتتالدى
الماتى قالاسىنداعى «اتاكەنت» قازاقستان ىسكەرلىك ىنتىماقتاستىق ورتالىعىندا ق ر مادەنيەت جانە سپورت مينيسترلىگىنىڭ قولداۋىمەن «اتاكەنت-ەكسپو» حالىقارالىق كورمە كومپانياسى مەن ق ر ۇلتتىق مەملەكەتتىك كىتاپ پالاتاسى، قازاقستاننىڭ باسپاگەرلەر، پوليگرافيستتەر جانە كىتاپ تاراتۋشىلار قاۋىمداستىعىمەن بىرلەسكەن «ۇلى جىبەك جولىمەن–2022» ح حالىقارالىق كىتاپ جانە پوليگرافيا جارمەڭكەسى اشىلدى، دەپ حابارلايدى Almaty-akshamy.kz.
قاراشانىڭ 23-25 ارالىعىندا وتەتىن «ۇلى جىبەك جولىمەن–2022» كورمەسى – جارمەڭكەگە قاتىسۋشى باسپاگەرلەر، كىتاپ تاراتۋشىلار جانە پوليگرافيستتەر قىزمەتىنىڭ، الماتى قالاسىنىڭ قوناقتارى مەن تۇرعىندارىنىڭ مادەني ومىرىندەگى ايشىقتى وقيعا سانالادى.
كورمەنىڭ نەگىزگى ماقساتتارىنىڭ ءبىرى – قازاقستانداعى زاماناۋي كىتاپتاردى كەڭىنەن تاراتۋعا قول ۇشىن بەرۋ، وتاندىق كىتاپ ءىسى سالاسىن نىعايتۋ، باسپا جۇمىسىنىڭ سۋبەكتىلەرى اراسىندا تاجىريبەمەن الماسۋ، وتاندىق كىتاپ نارىعىندا ۇلتتىق وندىرۋشىلەردىڭ ورنىن نىعايتۋ بولىپ تابىلادى، سونىمەن قاتار كوپتەگەن ەلدەردىڭ باسپاگەرلىك، پوليگرافيالىق جانە كىتاپساتۋشى كومپانيالاردىڭ اراسىندا مادەني جانە ىسكەرلىك بايلانىستاردى ۇلعايتۋ، ەلدەر مەن سەرىكتەس كومپانيالار اراسىنداعى بايلانىستاردىڭ ءارىقاراي دامىتۋ، پوليگرافيا، كىتاپساتۋ جانە كىتاپ وندىرىسىنە ەڭ سوڭعى تەحنولوگيالار ەڭگىزۋ جانە ت.ب.
كورمەدە قازاقستان، رەسەي، قىرعىزستان، وزبەكستان ەلدەرىنىڭ جەتەكشى باسپالارى، پوليگرافيالىق كومپانيالارى مەن كىتاپحانالارى، سونداي-اق، يران يسلام رەسپۋبليكاسىنىڭ الماتى قالاسىنداعى باس كونسۋلدىعىنىڭ مادەني وكىلدىگى كىتاپحانالىق جانە باسپا-پوليگرافيالىق سالالارىنىڭ بولاشاعى مەن وزەكتى ماسەلەلەرىن تالقىلاۋعا، ىسكەرلىك جانە كاسىبي بايلانىستاردى كەڭەيتۋگە جانە تاجىريبە الماسۋعا جينالدى.
«ۇلى جىبەك جولىمەن–2022» X حالىقارالىق كىتاپ جانە پوليگرافيالىق كورمە باعدارلاماسىندا كىتاپ نارىعىنىڭ ماماندارىنا – باسپاگەرلەرگە، كىتاپساتۋشىلارعا، ادەبي اگەنتتىكتەرىنە، پوليگرافيالىق كومپانيالارعا ارنالعان سەمينارلار، دوڭگەلەك ۇستەلدەر ەنگىزىلگەن:
- Bookfund.kz كىتاپتاردىڭ اقپاراتتىق-انىقتامالىق جۇيەسىنىڭ تانىستىرىلىمى؛
- «نارىقتاعى كىتاپ ءىسى: بۇگىن مەن بولاشاق» اتتى ەلىمىزدىڭ بارلىق وڭىرىنەن كەلگەن باسپاگەرلەردىڭ كەزدەسۋى؛
- «كىتاپ ءىسى نارىعىندا شەتەلدىك باسپا مەكەمەلەرىمەن تاجىريبە الماسۋ» اتتى دوڭگەلەك ۇستەل؛
- جازۋشى گۋزەل ياحينامەن شىعارماشىلىق كەزدەسۋ، قولتاڭبا بەرۋ ءراسىمى.
سونداي-اق، قازاقستاندىق بەلگىلى قالامگەرلەر جانە جاس اۆتورلارمەن كەزدەسۋلەر، جاڭادان شىققان كىتاپتاردىڭ تانىستىرىلىمى، ءتۇرلى كونسەرتتىك قويىلىمدار مەن جىر كەشتەرى ۇيىمداستىرىلادى. «بالالار جىلى» اياسىندا جەتكىنشەكتەردىڭ شىعارماشىلىعىن قولداۋعا ارنالعان ادەبي ويىندار مەن جۇمباقتار، ولەڭ وقۋ جانە ت.ب. بالالار باعدارلاماسى ازىرلەنگەن.
سونىمەن قاتار، كورمە اياسىندا 2020-2022 جىلدار ارالىعىندا جارىققا شىققان كىتاپتار اراسىنداعى بايقاۋدىڭ جەڭىمپازدارى ماراپاتتالدى. بۇل بايقاۋ التى نوميناسيا بويىنشا، ياعني، «جىل كىتابى»، «ۇزدىك كوركەم باسىلىم»، «ۇزدىك وقۋلىق»، «بالالار مەن جاسوسپىرىمدەرگە ارنالعان ۇزدىك كوركەم جانە تانىمدىق باسىلىم»، «ۇزدىك فوتوالبوم»، «ۇزدىك پوليگرافيالىق ورىنداۋ» نوميناسياسى بويىنشا جەڭىمپازدار انىقتالادى.