قازاقستاندا دزيۋدودان الەمدىك بەدەلدى جارىستاردىڭ ءبىرى – «Qazaqstan barysy Grand Slam» ءتۋرنيرى وتەدى، دەپ حابارلايدى Almaty-akshamy.kz.
تۋرنير ەلوردادا 16–18 ماۋسىم ارالىعىندا «بارىس ارەنا» سپورت كەشەنىندە ۇيىمداستىرىلادى.
حالىقارالىق دزيۋدو فەدەراسياسىنىڭ كۇنتىزبەسىنە «Qazaqstan barysy Grand Slam» اتاۋىمەن ەنگىزىلگەن بۇل جارىسقا بارلىعى 400-دەن استام سپورتشى قاتىسادى دەپ جوسپارلانعان. قاتىسۋشىلاردىڭ قاتارىندا وليمپيادا ويىندارى، الەم جانە ازيا چەمپيوناتتارىنىڭ جەڭىمپازدارى مەن جۇلدەگەرلەرى دە بار.
بۇل الەمدىك دودا بارلىق دزيۋدوشىلار ءۇشىن 2024 جىلى پاريجدە وتەتىن جازعى وليمپيادا ويىندارىنا جولداما الۋعا جاقسى مۇمكىندىك. سونىمەن قاتار، «Qazaqstan barysy Grand Slam» ءتۋرنيرى اياقتالعاننان كەيىن ەلىمىزدە دزيۋدودان حالىقارالىق وقۋ-جاتتىعۋ لاگەرى تۇراقتى نەگىزدە وتكىزىلەتىن بولادى.
دزيۋدودان قازاقستان قۇراماسى IJF Grand Slam جارىستارىندا وسى ۋاقىتقا دەيىن 7 التىن، 14 كۇمىس جانە 36 قولا مەدال ەنشىلەگەن. ءقازىر رەسپۋبليكا بويىنشا دزيۋدوشىلار سانى 90 مىڭعا جەتتى. باپكەرلەر سانى – 1304 ادام.
ەستەرىڭىزگە سالا كەتسەك، 2023 جىلدىڭ اقپان ايىندا قازاقستان دزيۋدو فەدەراسياسى ەلىمىزدە Grand Slam الەمدىك ءتۋرنيرىن وتكىزۋ ءۇشىن حالىقارالىق دزيۋدو فەدەراسياسىمەن (IJF) ءتورت جىلدىق كەلىسىمشارتقا قول قويدى.
Grand Slam (ۇلكەن دۋلىعا) – حالىقارالىق جارىس كۇنتىزبەسى بويىنشا IJF World Tour اياسىندا وتكىزىلەتىن الەمدىك جارىستار سەرياسى. IJF ەرەجەلەرى بويىنشا جارىستىڭ جەڭىمپازدارى مەن جۇلدەگەرلەرى اراسىندا الەمدىك جانە وليمپيادالىق رەيتينگتەردە ۇپايلار بولىنەدى. اتاپ ايتقاندا، 1 ورىن ءۇشىن 1000 ۇپاي، 2 ورىن ءۇشىن – 700 ۇپاي، 3 ورىن ءۇشىن – 500 ۇپاي ەسەپتەلەدى.