بيىل ەلىمىزدىڭ مەكتەپتەرىندەگى سوڭعى قوڭىراۋ بالالاردى قورعاۋ كۇنىمەن تۇسپا تۇس كەلدى.
بۇل قوس مەرەكە الماتى قالاسىنداعى بالالار كولونياسىنداعى سوتتالعان بالالار ءۇشىن تىپتەن ەرەكشە مەرەكە بولدى.
الماتى قالاسى قاجد №11 مەكەمەسىنىڭ باسشىلىعى بالالار كۇنى مەن سوڭعى قوڭىراۋ مەرەكەسىندە جازالى جاسوسپىرىمدەر ءۇشىن «اشىق ەسىك كۇنىن» ۇيىمداستىرىپ، بالالار ساعىنىپ جۇرگەن اتا-انالارىمەن، تۋىستارىمەن جۇزدەستى.
سالتاناتتى مەرەكەنى مەكەمە باستىعىنىڭ مىندەتىن اتقارۋشى ادىلەت مايورى د.ماشيمبايەۆ اشتى. ول بيىل ورتا مەكتەپتى بىتىرەتىن تۇلەكتەرگە اق جول تىلەپ، وقۋشىلاردىڭ ەسىندە ماڭگى قالاتىن ايتۋلى كۇنى بالالارىمەن جۇزدەسۋگە كەلگەن اتا-انالارى مەن تۋىستارىنا العىسىن ءبىلدىردى.
ويناقتاپ ءجۇرىپ وت باسقان بالالاردىڭ بۇگىنگى جاناشىرى دا، اتا-اناسىنىڭ ورنىنداعى قامقورشىلارى دا – مەكەمە قىزمەتكەرلەرى مەن مۇعالىمدەرى. وسىعان وراي بالالارعا جىل بويى ساپالى ءبىلىم بەرگەن ۇستازدار دا ماراپاتتالىپ، الماتى قالاسى بويىنشا قاجد باستىعى ادىلەت پولكوۆنيگى ا.قايىربەكوۆتىڭ العىس حاتىنا يە بولدى.
سوڭعى قوڭىراۋ سالتاناتىندا مەكتەپ ديرەكتورىنىڭ ورىنباسارى ليۋدميلا المازوۆا وقۋشىلاردى قۇتتىقتاپ، ولاردىڭ تەزىرەك جازالارىن وتەپ، تۋعان ۇيلەرىنە ورالۋلارىنا تىلەكتەستىگىن ءبىلدىردى. رەسپۋبليكاداعى قىلمىس جاساعان بالالار جازاسىن وتەيتىن جالعىز كولونيادا قازىرگى تاڭدا 36 بالا ۇستالۋدا. ونىڭ ىشىندە 27 بالا اسا اۋىر قىلمىس، 9 بالا اۋىر قىلمىس جاساعانى ءۇشىن سوتتالعان.
بالالار كولونياسىنداعى «اشىق ەسىك كۇنىندە» بارلىعى 21 اتا-انا مەن تۋىسقاندارى كەلىپ، سوتتالعان بالالاردىڭ قۋانىشىن ەسەلەي ءتۇستى.