وقىتۋ ەكى تىلدە وتەدى.
ۇمىتكەرلەردە جۇمىس ىستەپ تۇرعان بيزنەستىڭ بولۋى شارت، دەپ حابارلايدى Almaty-akshamy.kz
الماتى قالاسىنىڭ كاسىپكەرلەر پالاتاسىندا مەنتورلىق سۇيەمەلدەۋگە ىرىكتەۋ 22 جانە 25 مامىردا ءوتتى.
مەنتوردىڭ وقۋ كۋرسىنا قاتىسام دەيتىندەر كوپ بولدى. وقۋ كۋرسىنا 51 قىز-كەلىنشەك ءوتتى.
ەسكە سالا كەتسەك، بۇل قىزمەت "مەن كاسىپكەر" جوباسىنىڭ ايەلدەر كاسىپكەرلىگىن دامىتۋ ورتالىعىنىڭ باعىتى بويىنشا كورسەتىلەدى.
"مەنتورلىق باعدارلاماسى ءوزىنىڭ تيىمدىلىگىن كورسەتتى. وتكەن جىلعى 25 مەنتور بۇگىن دە ءوز بيزنەستەرىن تابىستى جۇرگىزىپ جاتىر. تالىمگەرلىكپەن كاسىپ باستاۋ، بيزنەستى ءتيىمدى جۇرگىزۋ وتە ىڭعايلى. ءار قاتىسۋشىعا مەنتورلىق سۇيەمەلدەۋ وسى جىلدىڭ سوڭىنا دەيىن كورسەتىلەدى. بيىل قاتىسۋشىلاردىڭ سانى ەكى ەسە كوپ، ولار ەكى توپقا بولىنەدى"، – دەدى الماتى ىسكەر ايەلدەر كەڭەسىنىڭ ءتورايىمى اقەركىن ەرالييەۆا.
باعدارلاما تالىمگەرلەرى "كەمەل ۇستاز" وقۋ-ادىستەمەلىك ورتالىعىنىڭ جەتەكشىسى نۇرسۇلۋ ورازبايەۆا جانە قبتۋ ۋنيۆەرسيتەتىنىڭ سەنور-لەكتورى، "Nativa Language Solution" وقۋ ورتالىعىنىڭ ديرەكتورى الۋا نۇربايەۆا بولىپ بەلگىلەندى.
تالىمگەرلەر بيزنەس باسشىلارىنىڭ بىلىكتىلىگىنە باعالاۋ جۇرگىزەدى، سونداي-اق بىلىكتىلىك پەن داعدىلاردى ودان ءارى ارتتىرۋ بويىنشا ۇسىنىستار مەن جۇمىس جوسپارىن ازىرلەيدى.
"جوبانىڭ ماقساتى – كاسىپكەر ايەلدەردى بيزنەس جۇرگىزۋ داعدىلارىنا ۇيرەتۋ، ماسشتابتاۋ جانە دامىتۋ، كاسىپكەر ايەلدەردى باعدارلاما شەڭبەرىندە بيزنەس جۇرگىزۋگە سۇيەمەلدەۋ، وقىتۋ جانە تالىمگەرلىك. بۇل قىزمەتتەردىڭ بارلىعى وتەۋسىز نەگىزدە كورسەتىلەدى"، – دەپ اتاپ ءوتتى الماتى قالاسى كاسىپكەرلەر پالاتاسىنىڭ ءتوراعاسى اۋەز تايمبەتوۆ.