استانادا ەت ونىمدەرىن ساتاتىن ساۋدا نىساندارىن تەكسەرۋ بارىسىندا شىعۋ تەگى بەلگىسىز 6 توننادان استام ەت اينالىمنان الىندى، دەپ حابارلايدى Aqshamnews ءتىلشىسى ءىىم باسپا ءسوز قىزمەتىنە سىلتەمە جاساپ.
ۆەدومستۆو حابارلاۋىنشا، ۆەتەرينارلىق ينسپەكسيامەن بىرگە جۇرگىزىلگەن رەيد كەزىندە ەت ونىمدەرىنىڭ قۇجاتتارى مەن سانيتارلىق تالاپتارعا سايكەستىگى تەكسەرىلگەن. تەكسەرۋ ناتيجەسىندە ساپاسى بەلگىسىز ۇلكەن كولەمدەگى ەت انىقتالىپ، ۆەتەرينارلىق ينسپەكسياعا جىبەرىلدى.
قالالىق بازارلار مەن رەسمي ەت وڭدەۋ كاسىپورىندارى دا باقىلاۋدان ءوتتى. رەيد بارىسىندا سانيتارلىق نورمالاردى ورەسكەل بۇزعان ءتورت جەراستى سەحى انىقتالدى. ونداعى كۇماندى ونىمدەر تاركىلەنىپ، اتالعان فاكتىلەر بويىنشا تەكسەرۋلەر جالعاسىپ جاتىر.
ءىىم مالىمەتىنشە، اۋىل شارۋاشىلىعى جانۋارلارىن ەسەپكە الۋ مەن سايكەستەندىرۋ ىسىنە ەرەكشە كوڭىل بولىنگەن. ستاسيونارلىق بەكەتتەر مەن جولداردا مال جانە ەت تاسىمالداعان 200-دەن استام كولىك تەكسەرىلگەن.
سونىمەن قاتار، پوليسيا قىزمەتكەرلەرى جەكە سەكتورلاردى دا ارالاپ، ءۇي جانۋارلارى مەن مال ۇستاۋشىلاردان قاجەتتى قۇجاتتار مەن ۆەتەرينارلىق انىقتامالاردى تالاپ ەتكەن.