استانادا قازاقستان كينولوگتار وداعى ۇيىمداستىرۋىمەن يتتەر كورمەسى ءوتتى.
ونىڭ اياسىندا ارنايى حالىقارالىق كوميسسيا قازاق تازى تۇقىمىنىڭ 100-گە جۋىق ءتۇرىن زەرتتەدى، دەپ حابارلايدى Almaty-akshamy.kz ەكولوگيا جانە تابيعي رەسۋرستار مينيسترلىگىنە سىلتەمە جاساپ.
ءىس-شاراعا قاتىسۋشىلار الدىندا ق ر ەكولوگيا جانە تابيعي رەسۋرستار ءمينيسترى ەرلان نىسانبايەۆ قۇتتىقتاۋ ءسوز سويلەدى.
ءوز سوزىندە: «تازى – قازاقتىڭ العاشقى يت تۇقىمى، قازاق حالقىنىڭ ماقتانىشى، جەتى قازىنانىڭ ءبىرى. ءقازىر قوعام مەن مەملەكەتتىڭ ءبىزدىڭ تۇقىمداردى ساقتاۋ جانە مولايتۋ جونىندەگى كۇش-جىگەرىن شوعىرلاندىرۋ، ولاردىڭ گەندىك قورىن دەگراداسيا مەن مەتيزاسيادان قورعاۋ جانە قولداۋ بويىنشا شارالار قابىلدانۋدا. قازاقتىڭ يت تۇقىمدارىن ساقتاۋ جانە ءوسىمىن مولايتۋ ماسەلەلەرى زاڭنامالىق دەڭگەيدە بەكىتىلدى، مەملەكەت باسشىسى قازاقستان رەسپۋبليكاسىنىڭ ءتيىستى زاڭىنا قول قويدى» دەپ اتاپ ءوتتى.
زەرتتەۋ قورىتىندىسى بويىنشا كوميسسيا كورمەدە حالىقارالىق كينولوگيالىق فەدەراسيانىڭ (FCI) باس كوميتەتىنىڭ قازاق تازىسىن حالىقارالىق تانۋ جانە «Kazakh Tazy» برەندىن قازاقستانعا بەكىتۋ تۋرالى جۇمىستار جاسالىپ جوسپارعا الىناتىنى بولادى.
قازاقستان كينولوگتار وداعىنىڭ پرەزيدەنتى باۋىرجان سەرىكقالي بۇل كورمە يتتەردىڭ سۇلۋلىعىن كورسەتۋ عانا ەمەس ەكەنىن اتاپ ءوتتى. بۇل قازاق حالقى ءۇشىن تاريحي ماڭىزى بار ءىس-شارا، ەلىمىزدىڭ ۇلتتىق ماقتانىشى مەن مادەني مۇراسىنىڭ نىشانى-قازاق تازى تۇقىمىن ۇلتتىق قازىنا جانە برەند رەتىندە بەكىتۋ جانە حالىقارالىق تانۋ مۇمكىندىگى بولىپ تابىلادى.
قازاقتىڭ يت تۇقىمدارىن حالىقارالىق دەڭگەيدە تانۋ ءۇشىن FCI مىندەتتى تالاپتارىنىڭ ءبىرى يتتەردى زەرتتەۋ، ولاردىڭ شىققان ەلىندەگى تۇقىمنىڭ جاي-كۇيى مەن دامۋ پەرسپەكتيۆالارىن زەرتتەۋ بولىپ تابىلادى.
كورمەگە قاتىسۋ ءۇشىن قازاقستان كينولوگتار وداعى ءارتۇرلى جاس ساناتتارى مەن تۇستەرىندەگى 100 ءيتتى مۇقيات ىرىكتەپ الدى.