2022 جىلى 218 213 ونكولوگيالىق پاسيەنت ديناميكالىق باقىلاۋدا بولسا، بىلتىرعى سانى 5،7%-كە ارتقان. ونىڭ 56%-تەن استامى – ايەل.
ال قاتەرلى ىسىكتىڭ تارالۋى بويىنشا ءبىرىنشى ورىندا ءسۇت بەزى وبىرى تۇر. 28 مامىر – حالىقارالىق ايەلدەر دەنساۋلىعىن قورعاۋ كۇنى، دەپ حابارلايدى Almaty-akshamy.kz.
ەلدە ايەلدەر اراسىندا قاتەرلى ىسىككە شالدىققاندار سانى ءورشىپ تۇر. ءبىرىنشى ورىندا ءسۇت بەزى قاتەرلى ىسىگى بولسا، ودان كەيىن جاتىر مويىنى مەن انالىق بەز وبىرى تۇر. دەرتكە شالدىققانداردىڭ دەنى 40 پەن 50 جاس اراسىندا. مامانداردىڭ ايتۋىنشا، دەر كەزىندە سكرينينگتەن ءوتۋ – قاتەرلى ىسىكتىڭ الدىن الۋعا كومەك.
مەرۋەرت جۇماجانوۆا، مەديسينالىق-گەنەتيكالىق كونسۋلتاسيالار ءبولىمىنىڭ مەڭگەرۋشىسى: - سكرينينگتەن ءوتۋ تاسىلدەرى نەمەسە جالپى اعزانى تولىقتاي تەكسەرىستەن وتكىزۋ بۇل ءار ادام ءۇشىن ماڭىزدى. ماماندار وسى تەكسەرىس ارقىلى قانداي دا ءبىر اۋىتقۋ بولماسا، ءقاۋىپ بارىن انىقتاپ، ارنايى ەم-دوم جاسايدى. بۇل – قاتەرلى اۋرۋلاردىڭ ەرتە كەزەڭدە انىقتاۋعا كومەك.
2023 جىلى ديناميكالىق باقىلاۋعا 218 213 ونكولوگيالىق پاسيەنت تىركەلگەن. بۇل 2022 جىلعا قاراعاندا 5،7%-كە وسكەن. ونىڭ ىشىندە 43،7%ء-ى ەرلەر بولسا، 56،9%ء-ى – ايەلدەر. بىلتىر 41 515 ناۋقاستان قاتەرلى ىسىك انىقتالسا، ونىڭ 12 مىڭنان استامى كوز جۇمعان. ناۋقاستاردىڭ 55،6%ء-ى – 18 بەن 64 جاس ارالىعىنداعى ەڭبەككە قابىلەتتى ادامدار. ال ءسۇت بەزى وبىرىنا شالدىققانداردىڭ ەڭ جاسى 23 جاستا.
نۇرشاي ازىمبايەۆا، ق ر دسم سانيتاريالىق-ەپيدەميولوگيالىق باقىلاۋ كوميتەتىنىڭ باسقارما باسشىسى: - قازىرگى كەزدە ادام پاپيللوماسى ۆيرۋسىنا قارسى ۆاكسيانسيانى ەنگىزۋ جونىندە جۇمىس باستالىپ جاتىر. وسى قازاقستان رەسپۋبليكاسىندا. مۇنىڭ وزەكتىلىگى – جاتىر مويىنى وبىرى، ياعني بۇل ونكولوگيالىق اۋرۋدىڭ ءبىزدىڭ ەلدە وتە جوعارى كورسەتكىشتە تىركەلۋى. نەگە؟ ويتكەنى جىل سايىن 1900-دەن استام ادام ايەلدەر وسى اۋرۋعا شالدىعادى. ول – وتە ۇلكەن كورسەتكىش.
جىل سايىن الەمدە جاتىر موينى وبىرىنان 300 مىڭعا جۋىق ايەل كوز جۇمادى. ال رەسپۋبليكا بويىنشا 2000-عا جۋىق جاڭا جاعداي تىركەلەدى، 600-دەن استام ايەل وسى پاتولوگيادان قايتىس بولادى. جاقىندا ۇكىمەت ادام پاپيللوماسى ۆيرۋسىنا قارسى ۆاكسينا ساتىپ الۋعا جانە قازاقستاندا ەكپە جۇمىسىن جۇرگىزۋگە 9،7 ملرد تەڭگەدەن استام قارجى ءبولدى. الداعى ۋاقىتتا 11 جاستاعى 175 مىڭعا جۋىق قىز بالانى ۆاكسينامەن قامتۋ كوزدەلگەن.