بۇگىن تۋريزم جانە سپورت مينيسترلىگى جانىنان كانۆون-2024 قىسقى جاسوسپىرىمدەر وليمپياداسى مەن پاريج-2024 جازعى وليمپيادا جانە پاراليمپيادا ويىندارىنا دايىندىق بويىنشا شتابتىڭ اشىلۋى ءوتتى.
2023 جىلعى 13 جەلتوقساندا سپورت ساراپشىلارىنىڭ قاتىسۋىمەن جاسوسپىرىمدەر وليمپياداسى مەن وليمپيادالىق جانە پاراليمپيادالىق ويىندارىنا ۇلتتىق قۇراما كوماندالارىنىڭ جۇمىسىن ۇيىمداستىرۋ بويىنشا شتاب قۇرۋ تۋرالى مينيسترلىكتىڭ بۇيرىعى قابىلدانعان بولاتىن، دەپ حابارلايدى اlmaty-akshamy.kz.
اتالعان شتاب مەملەكەت باسشىسىنىڭ تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراسيالارى بىرلەسە جۇمىس ىستەۋ كەرەك دەگەن تاپسىرماسىن ورىنداۋ ماقساتىندا قۇرىلدى. شتابتىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ. شتاب بارلىق كەشەندى جارىستار اياقتالعانعا دەيىن تۇراقتى نەگىزدە جۇمىس ىستەيتىن بولادى.
شتابتىڭ قۇرامىنا 6 ادام كىردى:
1. قاناعاتوۆ ە.ب. - ق ر ۇوك سپورت دەپارتامەنتىنىڭ ديرەكتورى؛
2. ساپييەۆ س.ج. – ق ر ۇوك باس حاتشىسىنىڭ ورىنباسارى؛
3. احمەتشارىپ د.س. – قوعام جانە بۇقارالىق اقپارات قۇرالدارىمەن بايلانىس جونىندە مينيستر كەڭەسشىسى؛
4. نۇرسافينا ا.ت. – قازاقستان رەسپۋبليكاسى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكسياسى» رمقك كوركەم گيمناستيكادان كوماندا باسشىسى؛
5. الدونعاروۆ ن.ج. – قازاقستان رەسپۋبليكاسى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكسياسى» رمقك سپورتتىق ورمەلەۋدەن كوماندا باسشىسى؛
6. قياتباي ب.ب. – «ۇلتتىق كونكيشىلەر فەدەراسياسى» رەسپۋبليكالىق قوعامدىق بىرلەستىگىنىڭ سپورتتىق ديرەكتورى.
ءىس-شاراعا وليمپيادا جەڭىمپازدارى مەن جۇلدەگەرلەرى جانە بيىلعى الەم بىرىنشىلىكتەرى مەن حالىقارالىق جارىستاردىڭ جەڭىمپازى مەن جۇلدەگەرى، سپورت جۋرناليستەرى قاتىستى. جيىندا ءسوز العان تۋريزم جانە سپورت ءمينيسترى ەرمەك مارجىقپايەۆ 2023 جىل ەل سپورتى ءۇشىن ءساتتى جىل بولعانىن، جەرلەستەرىمىز حالىقارالىق ارەنالاردا جارقىن جەڭىستەرگە قول جەتكىزگەنىنە ەرەكشە توقتالىپ، كەلەر جىلى وتەتىن بايراقتى باسەكەلەرگە دايىندىق بارىسىن باياندادى. ماسەلەن، بيىل ەلىمىزدە وتەتىن 5ء-شى دۇنيەجۇزىلىك كوشپەندىلەر ويىندارىنا اۋقىمدى دايىندىق وتكەن جىلى باستالدى. مەملەكەت باسىشىسى بىرەر كۇن بۇرىن «Egemen Qazaqstan» گازەتىنە بەرگەن سۇحباتىندا «دۇنيەجۇزىلىك كوشپەندىلەر ويىنىن وتكىزۋ دە ەلىمىز ءۇشىن ايتۋلى وقيعا بولماق. بايراقتى باسەكە ۇلتتىق سپورت پەن سالاماتتى ءومىر سالتىن دارىپتەۋ جاعىنان دا، ۇلى دالاداعى كوشپەندىلەر وركەنيەتىنىڭ مۇراگەرى سانالاتىن باۋىرلاس حالىقتاردىڭ مادەني-گۋمانيتارلىق بايلانىسىن ارتتىرۋ تۇرعىسىنان دا ماڭىزدى ەكەنى ءسوزسىز»، دەپ اتاپ وتكەن ەدى.
«بۇگىن ءبىز مەملەكەت باسشىسىنىڭ كانۆون-2024 قىسقى جاسوسپىرىمدەر وليمپياداسىنا، پاريجدەگى جازعى وليمپيادا جانە پاراليمپياداسىنا دايىندىق جونىندەگى تاپسىرماسىن ورىنداۋ ماقساتىندا قۇرىلعان شتابتىڭ ءبىرىنشى وتىرىسىنا جينالدىق. ۇلتتىق قۇرامانىڭ ساپالى دايىندىعى ءۇشىن سپورتشىلار پۋلى، ياعني ليسەنزيا مەن مەدال جەڭىپ الۋى مۇمكىن ۇمىتكەرلەر جاساقتالدى. قۇرامانىڭ كەيبىر كوشباسشىلارى وليمپياداعا جەكە جوسپار بويىنشا دايىندالادى. ياعني، ءار سپورت ءتۇرىنىڭ ەرەكشەلىگىن، سپورتشىنىڭ قاجەتتىلىگىن، فيزيوتەراپيانى، جاراقاتتاردى وڭالتۋ مەن الدىن الۋدى، پسيحولوگيالىق قولداۋدى جانە سپورتشىلاردى جارىسقا دايىندالۋدا سترەسستى باسقارۋعا كومەكتەسۋدى قوسا العاندا، مەديسينالىق-بيولوگيالىق قامتاماسىز ەتۋدى ەسكەرە وتىرىپ جاسالادى. ايتا كەتۋ كەرەك، سپورتشىلاردى دايارلاۋ كۇنتىزبەسىن قالىپتاستىرۋ تاسىلدەرى مەن قاعيداتتارى تولىعىمەن قايتا قارالدى»، - دەدى ەرمەك مارجىقپايەۆ.
ەستەرىڭىزگە سالا كەتەيىك، IV قىسقى جاسوسپىرىمدەر وليمپياداسى 2024 جىلدىڭ 19 قاڭتارى مەن 1 اقپانى ارالىعىندا وڭتۇستىك كورەيانىڭ كانۆون قالاسىندا وتەدى. ال فرانسيانىڭ پاريج قالاسىندا XXXIII جازعى وليمپيادا ويىندارى 2024 جىلدىڭ 26 شىلدەسى مەن 11 تامىزى ارالىعىندا وتسە، حVءىى جازعى پاراليمپيادا ويىندارى 2024 جىلى 28 تامىز 8 قىركۇيەكتىڭ ارالىعىندا وتەدى.