7 ءساۋىر مەن 1 مامىر ارالىعىندا استاناداعى St Regis قوناق ءۇيىنىڭ كيىز ۇيىندە شاحماتتان الەم چەمپيونى اتاعى ءۇشىن ماچ وتەدى، دەپ حابارلايدى almaty-akshamy.kz
ەستەرىڭىزگە سالا كەتەيىك، 2022 جىلدىڭ 31 قازانىندا شاحماتتان قازىرگى 16-الەم چەمپيونى ماگنۋس كارلسەن كلاسسيكالىق شاحماتتان الەم چەمپيونى اتاعىن قورعاۋدان باس تارتتى، وسىعان بايلانىستى 2022 جىلعى ءتۋرنيردىڭ جەڭىمپازدىعىنا ۇمىتكەر يان نەپومنياششييدىڭ قارسىلاسى تۋرنيردە ەكىنشى ورىن العان دين ليجەن بولدى. بۇل سپورتشىلار حالىقارالىق شاحمات فەدەراسياسىنىڭ (فيدە) الەمدىك رەيتينگىندە ەكىنشى جانە ءۇشىنشى ورىنداردى يەلەنەدى: يان نەپومنياششييدىڭ رەيتينگى 2793، دين ليجەننىڭ رەيتينگى 2788. قانداي ناتيجە بولسا دا بۇل ماچ 17-جاڭا شاحمات ءتاجىنىڭ يەگەرىن انىقتايدى.
استانادا وتەتىن الەم چەمپيوناتى العاشقى 40 اينالىمعا 120 مينۋت، كەلەسى 20 اينالىمعا 60 مينۋت جانە 61- اينالىمعا 30 سەكۋند قوسىپ قالعان اينالىمدارعا 15 مينۋت ۋاقىت باقىلاۋىمەن 14 پارتيادان تۇرادى. تەڭ ەسەپ بولعان جاعدايدا، قارسىلاستار راپيدتان پلەي-وفف وينايدى.
2 ميلليون ەۋرو جۇلدە قورىن تولىق قامتاماسىز ەتەتىن ءتۋرنيردىڭ باس سەرىكتەسى جانە ۇيىمداستىرۋشىسى – Freedom Holding Corp.
الەم چەمپيوناتىنا فيدە پرەزيدەنتى اركاديي دۆوركوۆيچ، شاحماتتان 14-الەم چەمپيونى ۆلاديمير كرامنيك، شاحماتتان 15-الەم چەمپيونى ۆيشي اناند، ايەلدەر اراسىنداعى شاحماتتان 4 دۇركىن الەم چەمپيونى حوۋ يفان، سونداي-اق گروسسمەيستەرلەر – دانييل دۋبوۆ، ۆيورەل بولوگان، ايەلدەر گروسسمەيستەرى، لاتۆيانىڭ بۇرىنعى ەكونوميكا ءمينيسترى جانە قارجى ءمينيسترى دانا رەيزنيسە-وزولا سياقتى ءبىرقاتار اتاقتى قوناقتار كەلەدى دەپ كۇتىلىپ وتىر.
چەمپيونات اياسىندا قوناقتار ءبىر مەزگىلدە ءبىرقاتار سەمينارلار مەن ويىن سەانستارىن وتكىزەدى. 2023 جىلعى الەم چەمپيوناتىن وتكىزۋ بارىسىندا قازاقستان رەسپۋبليكاسى مەن الەمنىڭ ايەلدەر قۇراما كوماندالارى (راپيد جانە بليس) اراسىندا حالىقارالىق ماچ وتەدى، سونداي-اق 14 جاسقا دەيىنگى ۇلدار مەن قىزدار اراسىندا Future World Champions 2023 I كەزەڭى وتەدى. بۇل كەزەڭ 2023 جىلعى قازاقستان رەسپۋبليكاسى بالالار كۋبوگىنىڭ فينالىنا قاتىساتىن ۇمىتكەرلەردى انىقتايدى.
"الداعى الەم چەمپيوناتى شاحمات الەمى ءۇشىن دە، قازاقستان ءۇشىن دە ماڭىزدى وقيعا بولىپ سانالادى. قازىرگى ۋاقىتتا ەلىمىزدەگى شاحمات ترەندتە. ءبىز شىنىمەن دە قىزىعۋشىلىقتىڭ ارتىپ كەلە جاتقانىن بايقايمىز. وسىعان بايلانىستى قازاقستان جاس ۇرپاق ءۇشىن شاحماتتى دامىتۋدىڭ باعدارلاماسىن قابىلدادى. ءقازىر فەدەراسيا الدىندا شاحماتتى تۇبەگەيلى جاڭا دەڭگەيگە كوتەرۋ، جاس شاحماتشىلارعا كەرەمەت مۇمكىندىكتەر جاساۋ جانە جاڭا تالانتتاردىڭ ىرگەتاسىن قالاۋ مىندەتى تۇر. ماچتى وتكىزۋ – قازاقستاننىڭ الەمدىك سپورتتاعى ماڭىزدىلىعىنىڭ جانە ءبىزدىڭ زور الەۋەتىمىزگە دەگەن سەنىمنىڭ دالەلى. الداعى جىلدارى ءبىزدىڭ سپورتشىلار جاڭا جەتىستىكتەرگە جەتەتىنىنە سەنىمدىمىن جانە ءبىز قازاقستاندىقتاردىڭ جەڭىسىمەن ماقتانامىز"، – دەپ اتاپ ءوتتى قازاقستان شاحمات فەدەراسياسىنىڭ پرەزيدەنتى تيمۋر تۋرلوۆ.