استانادا بۇگىننەن باستاپ ءبىرقاتار ۇيىمدار جاڭا جۇمىس كەستەسىمەن جۇمىس ىستەي باستادى. قالا اكىمدىگىنىڭ مالىمەتىنشە، بۇل قادام جولداعى كولىك كەپتەلىسىن ازايتۋ ءۇشىن قولعا الىنعان،- دەپ حابارلايدى اqshamnews.kz ءتىلشىسى.
جاڭا ءتارتىپ قالا ورتالىعىنداعى مەملەكەتتىك جانە جارتىلاي مەملەكەتتىك مەكەمەلەرگە قاتىستى. ەندى قالالىق كوممۋنالدىق قىزمەتتەر مەن اكىمدىك قىزمەتكەرلەرى جۇمىس كۇنىن تاڭعى 7:30-دا باستايدى. كەيبىر مەملەكەتتىك ورگاندار مەن جارتىلاي مەملەكەتتىك كومپانيالار دا جۇمىسقا 7:30-8:00 ارالىعىندا كىرىسەدى. تيىسىنشە، جۇمىس ۋاقىتىنىڭ اياقتالۋى دا ەرتەرەك بولادى.
اكىمدىك اتاپ وتكەندەي، بۇل وزگەرىس جەكە سەكتورعا، بيزنەس نىساندارىنا، مەكتەپتەر مەن بالاباقشالارعا، اۋرۋحانالار مەن ەمحانالارعا، حقكو-لار مەن وزگە دە الەۋمەتتىك مەكەمەلەرگە قاتىستى ەمەس. كەيبىر مينيسترلىكتەر مەن مەملەكەتتىك ورگاندار بۇرىنعىداي تاڭعى 8:00-دە جۇمىسىن باستايدى.
ايتا كەتسەك، استانادا جۇمىس كەستەسىن ەرتەرەككە اۋىستىرۋ تۋرالى ماسەلە بيىل ناۋرىزدا كوتەرىلگەن. ماۋسىمدا قالا اكىمى جەڭىس قاسىمبەك بۇل ۇسىنىس مەملەكەتتىك ورگاندار مەن كوممۋنالدىق قىزمەتتەر ءۇشىن قاراستىرىلىپ جاتقانىن ايتقان. ال ءماجىلىس دەپۋتاتى اسىلبەك نۇرالين ورتالىق بيلىك ورگاندارى مەن ۇلتتىق كومپانيالاردىڭ جۇمىس ۋاقىتىن 07:00 نەمەسە 08:00-گە اۋىستىرۋدى ۇسىنعان ەدى.
31 تامىزدا اكىمدىك جۇمىس كەستەسىنىڭ رەسمي تۇردە وزگەرگەنىن جاريالادى. جەرگىلىكتى بيلىك بۇل شەشىم كولىك اعىنىن رەتتەپ، ماگيسترالدارداعى جۇكتەمەنى ازايتۋعا كومەكتەسەدى دەپ كۇتىپ وتىر.