استانادا پوليسيا مايورى "جىگىتىنە كورسەتكەن قامقورلىعى ءۇشىن" 4 جىلعا سوتتالدى، - دەپ حابارلايدى Aqshamnews.kz ءتىلشىسى Azattyq Rýhy-نا سىلتەمە جاساپ.
استانا قالاسىنىڭ قىلمىستىق ىستەر جونىندەگى اۋدانارالىق سوتى پوليسيا مايورى ايدانا قالىبايدى قىزمەتتىك وكىلەتتىگىن تەرىس پايدالانعانى ءۇشىن كىنالى دەپ تانىپ، 4 جىلعا باس بوستاندىعىنان ايىردى. سونىمەن بىرگە وعان مەملەكەتتىك قىزمەتتە لاۋازىم يەلەنۋ قۇقىعىنا ءومىر بويىنا تىيىم سالىندى.
مايور نە ءبۇلدىردى؟
ايدانا قالىباي ىشكى ىستەر ورگاندارىندا 2013 جىلدان بەرى جۇمىس ىستەگەن. بۇرىنعى سۇحباتتارىندا ول بالا كەزىنەن پوليسيا قىزمەتكەرى بولۋدى ارمانداپ، جەتى جىلدا كاپيتان شەنىنە دەيىن كوتەرىلگەنىن ماقتانىشپەن ايتقان ەدى. كەيىن مايور اتاعىن العان.
سوت دەرەكتەرىنە سايكەس، قالىباي اكىمشىلىك پوليسيادا قىزمەت اتقارا ءجۇرىپ، جول ەرەجەسىن بۇزعاندارعا سالىنعان ايىپپۇلداردى زاڭسىز تۇردە باسقا ازاماتتاردىڭ اتىنا اۋدارىپ وتىرعان. بۇل ارەكەتتەرى مەملەكەتكە 3،6 ملن تەڭگەدەن استام زالال كەلتىرگەن. قىلمىستىق ءىس بويىنشا 10 ادام جابىرلەنۋشى دەپ تانىلدى.
سوت شەشىمى نە دەيدى؟
سوت شەشىمىمەن قالىبايدان مەملەكەت كىرىسىنە 408 مىڭ تەڭگەدەن استام سوت شىعىنى جانە جابىرلەنۋشىلەرگە وتەماقى تولەۋ قورىنا 69 مىڭ تەڭگە ءوندىرىلدى.
سوتتالۋشىنىڭ جالعىزباستى انا ەكەنى ەسكەرىلىپ، جازاسىن وتەۋ مەرزىمى 2029 جىلدىڭ 23 تامىزىنا دەيىن شەگەرىلدى. وسى ۋاقىتقا دەيىن ول ءۇيقاماقتا بولادى. ەگەر قوعامدىق ءتارتىپتى بۇزسا نەمەسە قاداعالاۋ ورگانىنىڭ ەسكەرتۋلەرىنە قۇلاق اسپاسا، جازاسىن وتەۋ ءۇشىن قاماۋعا جىبەرىلەدى.
ايدانا قالىباي بۇعان دەيىن پوليسيادا جوعارى شەنگە جەتىپ، زەينەتكە دەيىن قىزمەت ەتۋدى ارمانداعان. الايدا سوت ۇكىمىنە سايكەس، ول "پوليسيا مايورى" ارنايى اتاعىنان ايىرىلدى.
قازىرگى ۋاقىتتا ونىڭ ىسىنە بايلانىستى قوسىمشا تەكسەرۋلەر مەن سۇراۋلار جۇرگىزىلىپ جاتىر.