استانادا ق ر وقۋ-اعارتۋ مينيسترلىگىنىڭ قولداۋىمەن «INFORMATICS-ASIA» حالىقارالىق كومپيۋتەرلىك جوبالار بايقاۋى باستالدى. جارىسقا 4 مەملەكەتتەن 184 جوبامەن 450 وقۋشى قاتىسادى، دەپ حابارلايدى almaty-akshamy.kz
بايقاۋدىڭ نەگىزگى ماقساتى:
- IT سالاسىندا عىلىمي زەرتتەۋشىلىككە قىزىعۋشىلىق تانىتاتىن دارىندى جاستاردى انىقتاۋ، قولداۋ جانە دامىتۋ؛
- IT سالاسىن دامىتۋدىڭ ءتيىمدى قۇرالى رەتىندە دارىندى وقۋشىلاردىڭ عىلىمي-زەرتتەۋ ارەكەتىنە نەگىزدەلگەن جاڭا جوبالاردى ازىرلەۋ؛
- ءارتۇرلى ەلدەردەن وقۋشىلار مەن مۇعالىمدەردى تارتۋ ارقىلى حالىقارالىق ىنتىماقتاستىقتى نىعايتۋ جانە شىعارماشىلىق تاجىريبە الماسۋ.
جارىس اعىلشىن تىلىندە جۇرگىزىلەدى جانە التى باعىت بويىنشا وتەدى: روبوتوتەحنيكا - FLL Challenge جانە Arduino Hackathon؛ كومپيۋتەرلىك باعدارلامالاۋ؛ كومپيۋتەرلىك گرافيكا جانە ونەر؛ قولدانبالى عىلىمي جوبالار؛ قىسقامەتراجدى فيلمدەر؛ قولدانبالى ماتەماتيكا جوبالارى.
ايتا كەتۋ كەرەك، اتالمىش ءبىلىم بايگەسى قازاقستاندا 10 جىلدان بەرى وتكىزىلىپ كەلەدى. وسى ۋاقىت ىشىندە ءىس-شاراعا 20 مەملەكەتتەن 5000-عا جۋىق وقۋشى قاتىستى. جارىستان ۇزدىك شىققان جۇلدەگەرلەر ەلىمىزدىڭ جانە الەمنىڭ بەدەلدى جوو گرانتتارىنا يە بولىپ، قازىرگى تاڭدا مەملەكەتىمىزدىڭ ءار سالاسىندا ۆيدەوگراف، ديزاينەر، پروگرامميست سياقتى جۇمىستار اتقارىپ كەلەدى.
بايقاۋ 18 جەلتوقسان كۇنى قورىتىندىلانادى.
بايقاۋ ۇيىمداستىرۋشىلارى: ق ر وام «دارىن» رەسپۋبليكالىق عىلىمي-پراكتيكالىق ورتالىعى جانە «ءبىلىم-يننوۆاسيا» حالىقارالىق قوعامدىق قورى بولىپ تابىلادى.