استانانىڭ پوليسەيلەرى قالادا ءىرى كولەمدە ەسىرتكى ساتۋمەن اينالىسقان توپتى ۇستادى، دەپ حابارلايدى almaty-akshamy.kz Polisia.kz سىلتەمە جاساپ.
پوليسەيلەر «قاراسورا – 2023» جەدەل-پروفيلاكتيكالىق ءىس-شاراسى كەزىندە ءىرى كولەمدە ەسىرتكى زاتتارىن زاڭسىز ساتۋمەن اينالىسقان 38، 33 جانە 30 جاستاعى جامبىل وبلىسىنىڭ ءۇش تۇرعىنىن قولعا ءتۇسىردى. ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى ەسىرتكى ساتۋشىلار توبى تۇرعان پاتەردى ءتىنتىپ، ەسىرتكى وسىمدىك تەكتەس سۇر-جاسىل زاتى بار لەنتاعا ورالعان پوليەتيلەن پاكەتتەرىن تاپقان.
ساراپشىنىڭ قورىتىندىسىنا سايكەس، تاركىلەنگەن زاتتار جالپى سالماعى 5 كەلى، 150 گرامم بولاتىن گاشيش ەكەنى راستالدى. تەرگەۋ كەزىندە ۇستالعاندار كىناسىن مويىنداپ، استانا قالالىق پد ۋاقىتشا ۇستاۋ يزولياتورىنا قامالدى.
ەسىرتكى ساتۋشىلاردىڭ ءبىرى وسىعان ۇقساس قىلمىستى جاساعانى ءۇشىن بۇرىن دا بىرنەشە رەت سوتتالعانى بەلگىلى بولدى. ءقازىر اتالعان فاكتى بويىنشا ق ر قىلمىستىق كودەكسىنىڭ 297-بابى 2-بولىگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر.
ءتارتىپ ساقشىلارى ەگەر ادام اسا ءىرى مولشەردە ەسىرتكى مەن پسيحوتروپتىق زاتتاردى، سوعان ۇقساس باسقا دا زاتتاردى ساتۋمەن، زاڭسىز ءوندىرۋ، قايتا وڭدەۋ، يەمدەنىپ، ساقتاۋمەن اينالىسسا 6 جىلدان 12 جىلعا سوتتالۋى مۇمكىن ەكەنىن ەسكە سالادى.