باسىنا كونديسيونەر قۇلاعان 23 جاستاعى فەلدشەر ۇلدانا مىرزۋان اۋرۋحانادا كوز جۇمدى. قايعىلى حاباردى استانانىڭ قوعامدىق دەنساۋلىق ساقتاۋ باسقارماسى مالىمدەدى، - دەپ حابارلايدى aqshamnews.kz ءتىلشىسى.
"تۇرعىن ءۇي كەشەنىنىڭ قاسبەتى مەن كونديسيونەر قۇلاۋىنان قىزمەتتىك مىندەتتەرىن اتقارۋ كەزىندە اۋىر جاراقات العان فەلدشەر 18 قاراشادا كوز جۇمدى"، - دەلىنگەن حابارلامادا.
ۇلدانا 8 قاراشادان بەرى جانساقتاۋ بولىمىندە اۋىر جاعدايدا جاتقان ەدى.
وقيعانىڭ ءمان-جايى
8 قاراشادا استانادا تاۋەلسىزدىك داڭعىلى، 24ب مەكەنجايىنداعى توعىز قاباتتى تۇرعىن ءۇيدىڭ قاسبەتىنەن سىرتقى كىرپىش قاپتاماسى مەن كونديسيونەر قۇلاپ، بەس ادام زارداپ شەككەن ەدى.
زارداپ شەككەندەر №1 كوپسالالى اۋرۋحاناعا جەتكىزىلدى. ءبىر ناۋقاستىڭ جاعدايى وتە اۋىر، شۇعىل وپەراسيا جاسالدى. ەكەۋى جانساقتاۋ بولىمىندە، جاعدايلارى اۋىر دەپ باعالاندى. تاعى ەكى ناۋقاستىڭ جاعدايى تۇراقتى، ولار بولىمشەدە جاتىر.
بۇعان دەيىن الەۋمەتتىك جەلىدە زارداپ شەككەن فەلدشەردىڭ كۇيەۋى ۆيدەو جاريالاپ، جۇبايىنىڭ ادامدارعا كومەكتەسۋ كەزىندە باسىنا كونديسيونەر قۇلاعانىن ايتقان. ونىڭ سوزىنشە، ايەلىنە گەماتومانى الىپ تاستاۋ جانە باس سۇيەگىنە ترەپاناسيا جاساۋ وپەراسياسى جاسالعان. اۆتور سونداي-اق ءىىم وندىرىستىك جاراقات جونىندەگى ءوتىنىشتى قابىلداماي وتىر دەپ مالىمدەگەن.