مەملەكەت باسشىسى ەلوردا تورىندە ۇلى اقىن، كورنەكتى ويشىل الىشەر ناۋايدىڭ ەڭسەلى ەسكەرتكىشىنىڭ بوي كوتەرۋى، ەڭ الدىمەن، قازاق جۇرتىنىڭ وزبەك حالقىنا دەگەن ەرەكشە ىقىلاسىنىڭ بەلگىسى ەكەنىن ايتتى، دەپ حابارلايدى aqshamnews.kz.
– ءبىز – ەجەلدەن ەنشىسى بولىنبەگەن اعايىن ەلمىز. جۇرتىمىزدى بىرىكتىرەتىن ورتاق قۇندىلىقتار كوپ. تاريحىمىز بەن ءتىلىمىز – تامىرلاس، ءدىنىمىز – ورتاق. ەكى ەل اراسىنداعى باۋىرلاستىق بايلانىستىڭ وزىندىك ءداستۇرى قالىپتاسقان. بۇل رەتتە الىشەر ناۋايدىڭ الاتىن ورنى ەرەكشە. مۇحتار اۋەزوۆ «الىشەر ناۋاي جالعىز وزبەك ادەبيەتىنىڭ كولەمىندە قالعان جوق. بەرتىن كەلە ازياداعى، شىعىستاعى كوپ ەلدىڭ ادەبيەتىنە اسەر ەتتى» دەگەن. ءبىز ۇلى اقىننىڭ مۇراسىن كۇللى تۇركى جۇرتىنىڭ رۋحاني قازىناسى دەپ سانايمىز، – دەدى قازاقستان پرەزيدەنتى.
مەملەكەت باسشىسى تۇركى ادەبيەتىنىڭ كوكجيەگىن كەڭەيتىپ، ونى الەمدىك دەڭگەيگە كوتەرگەن الىشەر ناۋايدىڭ تۋىندىلارى مەن ەڭبەكتەرىن قازاق حالقىنىڭ كورنەكتى قايراتكەرلەرى جوعارى باعالاعانىن جەتكىزدى.
– ءبىز شوقان ءۋاليحانوۆتىڭ الىشەر ناۋاي شىعارماشىلىعىن العاش زەرتتەۋشىلەردىڭ ءبىرى بولعانىن ماقتان تۇتامىز. ال ۇلى اباي ونى وزىنە ۇستاز ساناعان. الىشەر ناۋايدىڭ وزىنە ءتان قولتاڭباسى، ويىنىڭ تەرەڭدىگى جانە كوركەمدىك شەبەرلىگى كۇللى الەم اقىندارى مەن جازۋشىلارىنا شابىت سىيلادى. بۇل ءۇردىس ءالى دە جالعاسىپ كەلەدى. ناۋاي سوڭىندا ادەبي عانا ەمەس، باي فيلوسوفيالىق مۇرا قالدىردى. ونىڭ گۋمانيستىك يدەيالارى الەمنىڭ اقىل-وي قازىناسىندا ەرەكشە ورىن الادى. ويشىلدىڭ دۇنيەتانىمى مەن تەرەڭ كوزقاراسىن ايشىقتايتىن تراكتاتتارى وسى ۋاقىتقا دەيىن وزەكتىلىگىن جويعان جوق، – دەدى مەملەكەت باسشىسى.
قاسىم-جومارت توقايەۆ الىشەر ناۋايدىڭ تاريحتا تالانتتى مەملەكەت قايراتكەرى، عىلىم مەن ونەردىڭ قولداۋشىسى رەتىندە قالعانىن اتاپ ءوتتى. سونىمەن قاتار ول ءوزىنىڭ زور ابىروي-بەدەلىن ءبىلىم مەن مادەنيەتتى ناسيحاتتاۋعا جۇمساپ، كوپتەگەن مەدرەسەلەر مەن كىتاپحانالاردىڭ سالىنۋىنا ۇيىتقى بولعانىن ايتتى.
مەملەكەت باسشىسى ءسوزىن قورىتىندىلاي كەلە، بۇل ەسكەرتكىش ءتۇبى ءبىر تۇركى جۇرتىنىڭ عاسىرلار بويى جالعاسىپ كەلە جاتقان باۋىرلاستىعىن سيپاتتايتىنىن، وسى ساباقتاستىقتى ساقتاپ، نىعايتا ءتۇسۋ بارشامىزعا ورتاق مىندەت ەكەنىن اتاپ ءوتتى. شاۆكات ميرزيويەۆ قاسىم-جومارت توقايەۆ پەن قازاقستان حالقىنا العىس ايتىپ، ۇلى ويشىلدىڭ شىعارماشىلىعى ورتاق قازىنا دەپ باعالادى.
– وزبەك پەن قازاق تۋىسقان حالىق. ەكى ەلدىڭ تاريحى، مادەنيەتى، سالتى مەن ءداستۇرى ءبىر. ءبىز مۇنى قاستەر تۇتامىز. قازاقتىڭ كورنەكتى اقىنى، مارقۇم نەسىپبەك ايت ۇلى 2020 جىلى الىشەر ناۋايدىڭ ەڭ باستى ەڭبەگى «حامسانى» قازاق تىلىنە اۋدارىپ، جارىققا شىعارعانىن ەرەكشە ىقىلاسپەن ايتقىم كەلەدى. ال بۇل شىعارمانىڭ ءالعىسوزىن قازاقستان پرەزيدەنتىنىڭ ءوزى جازعانى بىزگە زور قۋانىش سىيلايدى، – دەدى وزبەك ەلىنىڭ باسشىسى.
سالتاناتتى شاراعا قازاقستان مەن وزبەكستاننىڭ رەسمي دەلەگاسيا مۇشەلەرى، سونداي-اق ەكى ەلدىڭ زيالى قاۋىم وكىلدەرى قاتىستى.