قاسىم-جومارت توقايەۆ پەن سادىر جاپاروۆ استاناداعى ايكول ماناس ەسكەرتكىشىن سالتاناتتى تۇردە اشتى
مەملەكەت باسشىسى شارادا سويلەگەن سوزىندە ەلوردادا مۇنداي ەڭسەلى ەسكەرتكىشتىڭ بوي كوتەرۋى، ەڭ الدىمەن، قازاق حالقىنىڭ قىرعىز اعايىنعا دەگەن رياسىز قۇرمەتىنىڭ بەلگىسى ەكەنىن اتاپ ءوتتى، دەپ حابارلايدى اlmaty-akshamy.kz.
– ەكى جىل بۇرىن بىشكەكتە ۇلى ابايدىڭ ەسكەرتكىشى اشىلعانىن بىلەسىزدەر. مەن سول شاراعا ارنايى بارىپ قاتىستىم. مۇنداي يگى باستامالار ەكى ەلدىڭ دوستىق بايلانىسىن نىعايتا تۇسەتىنى ءسوزسىز، – دەدى قازاقستان پرەزيدەنتى.
قاسىم-جومارت توقايەۆ مىڭجىلدىق تاريحى بار ماناس جىرىن بارشا ادامزات رۋحانياتىندا وزىندىك ورنى بار بىرەگەي مۇرا رەتىندە اتاپ ءوتىپ، ونى تەك قىرعىز حالقىنىڭ عانا ەمەس، تۇتاس تۇركى جۇرتىنىڭ باعا جەتپەس قازىناسى دەۋگە بولاتىنىن ايتتى.
– ايگىلى جىردىڭ زامان سىناعىنان امان ءوتىپ، بۇگىنگى كۇنگە جەتۋىنە قازاق عالىمدارى زور ۇلەس قوسقان. وسى ورايدا شوقان ءۋاليحانوۆ، مۇحتار اۋەزوۆ، الكەي مارعۇلان سياقتى ءبىرتۋار تۇلعالاردى اتاپ وتۋگە بولادى، – دەدى قاسىم-جومارت توقايەۆ.
قازاقستان پرەزيدەنتى ەكى ەلدىڭ مادەني مۇرالارىنىڭ تامىرى ءبىر ەكەنىنە نازار اۋدارىپ، قازاق پەن قىرعىزدىڭ ايگىلى تۇلعالارى قاي كەزدە دە ءوزارا تىلەكتەس، نيەتتەس بولعانىنا توقتالدى. مەملەكەت باسشىسى ەلىمىزدەگى سۋ تاسقىنىنا قارسى كۇرەستە كومەك قولىن سوزعان بارشا قىرعىز جۇرتىنا قازاق ەلىنىڭ اتىنان زور ريزاشىلىعىن ءبىلدىردى.
– باس قالامىزدا بوي كوتەرگەن وسى ساۋلەت تۋىندىسى ءتۇبى ءبىر تۇركى جۇرتىنىڭ بىرلىگىن كورسەتەدى. بۇل – ماناسقا عانا ەمەس، قازاق پەن قىرعىزدىڭ ماڭگىلىك باۋىرلاستىعىنا قويىلعان ەسكەرتكىش. مەن ەكى ەلدىڭ دوستىعى ەشقاشان مىزعىمايدى دەپ سەنەمىن، – دەدى قاسىم-جومارت توقايەۆ.
