21 ساۋىردە استانا قالاسىنداعى «Keruen» ساۋدا-ويىن-ساۋىق ورتالىعىندا ورنالاسقان Kinopark كينوتەاترىندا «90+1» كينوكارتيناسىنىڭ جابىق كورسەتىلىمى ءوتتى. شارانىڭ اشىلۋىندا مادەنيەت كوميتەتى ءتوراعاسىنىڭ ورىنباسارى ايدىن قاپاشيەۆ وتاندىق كينويندۋستريانىڭ دامۋى مەن جاڭا سپورتتىق باعىتتاعى فيلمگە قاتىستى ويىن ورتاعا سالدى، دەپ حابارلايدى aqshamnews.kz
«مەملەكەت باسشىسى قاسىم-جومارت توقايەۆ ۇلتتىق مادەنيەتىمىزدى جاڭعىرتۋ، تاريحي سانانى قالىپتاستىرۋ جانە وسكەلەڭ ۇرپاقتى تاربيەلەۋ ىسىندە كينونىڭ ءرولى ەرەكشە ەكەنىن بىرنەشە مارتە اتاپ ءوتتى. ويتكەنى كينو – تەك ونەر تۋىندىسى عانا ەمەس، ول – ۇلتتىق بولمىستى ايقىندايتىن قۋاتتى قۇرال. وسى ورايدا مەملەكەت تاراپىنان الەۋمەتتىك، تاريحي تاقىرىپتاردى، وتباسىلىق قۇندىلىقتاردى قاۋزايتىن مازمۇندى كينوجوبالارعا ەرەكشە كوڭىل ءبولىنىپ كەلەدى. بۇل – ەل بولاشاعى ءۇشىن جاسالىپ جاتقان ماڭىزدى قادام.
بۇگىن نازارلارىڭىزعا ۇسىنىلىپ وتىرعان «90+1» ءفيلمى دە – وسى باعىتتاعى ماڭىزدى تۋىندىلاردىڭ ءبىرى. فيلم مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن جارىققا شىقتى. ءبىز بۇل تۋىندىنى تەك جاستار عانا ەمەس، ءاربىر اتا-انا، ءاربىر وتباسى كورسە ەكەن دەيمىز. سەبەبى بالانىڭ بويىنداعى سەنىمدى وياتۋ – تەك سوزبەن ەمەس، ونەگەمەن كەلەدى. ال ونەگە وسىنداي ءماندى دە ماعىنالى تۋىندىلار ارقىلى بەرىلەدى»، – دەدى ا.قاپاشيەۆ.\
اتالعان جوبانى «SBA Enterprise» كينوكومپانياسى جۇزەگە اسىردى. كينوكارتينانىڭ رەجيسسەرى – «بيزنەس پو-كازاحسكي»، «اكىم» سەكىلدى جوبالارمەن تانىلعان تيمۋر دۋلاتوۆ. باستى رولدەردى قۋانىش كەرىمقۇلوۆ، المات ساقاتوۆ جانە تانىمال بلوگەر ارتۋر اسقار ۇلى سومدايدى.
«بۇعان دەيىن كينو ورتالىق قوعام ءۇشىن ماڭىزدى 117 كارتيناعا قولداۋ كورسەتىپ، كورەرمەنگە ساپالى، الەۋمەتتىك باعىتتاعى، تاريحي، وتباسىلىق قۇندىلىقتاردى دارىپتەيتىن، سونىمەن قاتار بالالارعا ارنالعان مازمۇندى كونتەنت ۇسىنۋعا ۇلەس قوستى.
«90+1» ءفيلمى – جاستار مەن جاسوسپىرىمدەرگە ارنالعان موتيۆاسيالىق تۋىندى. فيلم ارقىلى: «قانداي جاعداي بولسا دا، ارمانىڭنان باس تارتپا!» دەگەن باستى ويدى جەتكىزگىمىز كەلەدى. بۇل ارقىلى ءبىز ءارتۇرلى جاستاعى كورەرمەننىڭ سۇرانىسىن ەسكەرۋدى ماقسات ەتەمىز. قازىرگى تاڭدا ۇلتتىق كينو ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋ كونكۋرسىنىڭ ەكىنشى كەزەڭىن باستادى. بيىل دا ءبىز ساپالى تۋىندىلاردى قولداۋعا كۇش سالاتىن بولامىز»، – دەدى ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ورىنباسارى ادىلەت وماروۆ.
فيلم سيۋجەتىنە كەلسەك، باستى كەيىپكەردىڭ اتا-اناسى جول اپاتىنا ۇشىراپ، وعان وتباسىنىڭ تىرەگى ءارى سۇيەنىشى بولۋعا تۋرا كەلەدى. فۋتبول دەسە، جانىن بەرەتىن جىگىتتىڭ بالا كۇنگى ارمانىنان قول ۇزگىسى جوق. تۋىندى شىتىرمانعا تولى حيكاياعا نەگىزدەلگەن.
«90+1» – بۇل تەك سپورتتىق دراما ەمەسىز قانداي قيىندىق بولماسىن، ارمانعا جەتۋگە بولاتىنىن كورسەتكىمىز كەلەدى. بۇل – اتا-انالارعا دا «بالالارىڭىزعا سەنىڭىزدەر، قولداۋ كورسەتىڭىزدەر!» دەگەن ۇندەۋ»، – دەدى ءفيلمنىڭ سەناريسى جانە باستى ءرولدى سومداۋشى قۋانىش كەرىمقۇلوۆ.
ايتا كەتەيىك، «90+1» ءفيلمى 2025 جىلعى 24 ساۋىردەن باستاپ قازاقستاننىڭ بارلىق وڭىرلەرىندە كەڭ كولەمدى پروكاتقا شىعادى.