فەستيۆال بارىسىندا شەبەرلىك ساعاتتارى، دارىستەر، شىعارماشىلىق زەرتحانالار، ديزاينەرلەر، سۋرەتشىلەر مەن يلليۋستراتورلاردىڭ كورمەلەرى، قولونەرشىلەر جارمەڭكەلەرى وتەدى. سونىمەن قاتار ارتىستەر ساحنادا ونەر كورسەتىپ، ءبىلىم بەرۋ مەكەمەلەرى، قالالىق باستامالار، بيزنەس پەن قوعامدىق ۇيىمدار جوبالارىن تانىستىرۋ سەكىلدى 100-دەن استام ءىس-شارا جوسپارلانعان.
ۇلتتىق كرەاتيۆ فەستيۆالىنىڭ ماقساتى – ەل تۇرعىندارى مەن قوناقتارىنا قاتىسۋشىلاردى تانىستىرىپ، كرەاتيۆتى يندۋستريانىڭ دامۋىن قولداۋ. بۇگىندە بۇل سالا الەمنىڭ كوپتەگەن ەلىندە جاڭا جۇمىس ورىندارىنىڭ اشىلۋىنا، بيزنەستىڭ دامۋىنا، مادەني قۇندىلىقتاردى جاھانعا تانىتۋعا جانە يننوۆاسياعا وڭ اسەر ەتەتىن قوزعاۋشى كۇش رەتىندە تانىلدى.
بۇۇ مالىمەتى بويىنشا، جاھاندىق دەڭگەيدە كرەاتيۆتى يندۋسترياعا الەمدىك ءجىو-نىڭ شامامەن 3،1%-ى تيەسىلى جانە بۇل سالادا ەڭبەككە قابىلەتتى حالىقتىڭ 6،2%-ى جۇمىس ىستەيدى. ولاردىڭ ىشىندە جاستار ۇلەسى ەرەكشە. ساراپشىلاردىڭ بولجامى بويىنشا، 2030 جىلعا قاراي بۇل سالا الەمدىك ءجىو-نىڭ 10%-ىن قۇراۋى مۇمكىن. ال قازاقستاندا 2029 جىلعا دەيىن كرەاتيۆتى يندۋستريانۆڭ ەل ەكونوميكاسىنا قوساتىن ۇلەسى 2%-عا دەيىن وسەدى دەپ كۇتىلۋدە.
بۇۇ باس اسسامبلەياسى 2017 جىلى 21 ءساۋىردى دۇنيەجۇزىلىك كرەاتيۆ پەن يننوۆاسيالار كۇنى دەپ جاريالاعان بولاتىن. بۇل كۇننىڭ ماقساتى — شىعارماشىلىق جۇمىستىڭ ءومىردىڭ بارلىق سالالارىنداعى ماڭىزىنا نازار اۋدارۋ.
فەستيۆالدى ۇيىمداستىرۋ كوميتەتى اتاپ وتكەندەي، قازاقستاننىڭ دۇنيەجۇزىلىك كرەاتيۆ كۇنىن اتاپ ءوتۋى — ەلدىڭ كرەاتيۆتى ەكونوميكاعا كورسەتكەن قولداۋى مەن مادەنيەت، ءبىلىم، يننوۆاسيالار سالاسىندا حالىقارالىق سەرىكتەستىك جولىنداعى ماڭىزدى قادام. ۇيىمداستىرۋشىلار 2026 جىلى فەستيۆال اياسىن كەڭەيتىپ، ەلدىڭ بارلىق وڭىرلەرىن قامتۋدى جوسپارلاپ وتىر.