ەلوردادا Astana Open ATP 500 ءتۋرنيرىنىڭ جەرەبەسى تارتىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
قازاقستان تەننيس فەدەراسياسىنان ءمالىم ەتكەندەي، ەلىمىزدىڭ ءبىرىنشى، الەمنىڭ 41-راكەتكاسى الەكساندر بۋبليك العاشقى اينالىمدا دۇنيەجۇزىلىك رەيتينگتە 52-ورىندا تۇرعان نيدەرلاندىلىق تاللون گريكسپۋرمەن كەزدەسەدى.
ميحايل كۋكۋشكين الەمنىڭ 6-راكەتكاسى، گرەكيالىق ستەفانوس سيسيپاسپەن وينايدى.
اقتاۋ تەننيس مەكتەبىنىڭ تۇلەگى، 21 جاستاعى بەيبىت جۋكايەۆ الەمنىڭ 35-راكەتكاسى، نيدەرلاندىلىق بوتيك ۆان دە زاندسحۋلپپەن كورتقا شىعادى.
الەمنىڭ ءبىرىنشى راكەتكاسى، US Open-2022 ءتۋرنيرىنىڭ چەمپيونى، يسپانيالىق كارلوس الكاراس رەيتينگتە 31-ساتىداعى دانيالىق حولگەر رۋنەمەن سىنعا تۇسەدى.
جارىستىڭ ەكىنشى راكەتكاسى، رەسەيلىك دانييل مەدۆەديەۆ يسپانيالىق البەرت راموس ۆينولاسقا قارسىلاس اتاندى.
دوداعا سونداي-اق «ۇلكەن دۋلىعا» ءتۋرنيرىنىڭ 21 دۇركىن چەمپيونى، سەربيالىق نوۆاك دجوكوۆيچ (جارىستىڭ 4-راكەتكاسى)، رەسەيلىك اندرەي رۋبليەۆ (5)، يتاليالىق ياننيك سيننەر (6)، پولياك حۋبەرت حۋركاچ (7)، كانادالىق فەليكس وجە-الياسسيم (8) جانە باسقالار قاتىسادى.
«تۋرنيرگە قاتىسۋشىلاردىڭ قۇرامى وتە مىقتى. «ماستەرس» جانە «ۇلكەن دۋلىعا» جارىستارىنان كەم تۇسپەيدى. سوندىقتان ماچتار وتە تارتىستى وتەتىن بولادى. ءوز شەبەرلىگىمدى كورسەتۋ ءۇشىن بار كۇشىمدى سالامىن»، دەدى دانييل مەدۆەديەۆ.