ءداستۇرلى شارا
بەدەلدى الەمدىك بۇقارالىق اقپارات قۇرالدارى توپ-مەنەدجەرلەرىنىڭ كەزەكتى كەزدەسۋى ەلوردادا وتەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ءداستۇرلى Astana Media Week شاراسى 27-28 قىركۇيەككە جوسپالانعان.
وعان مەملەكەت قايراتكەرلەرى، تەلە-كونتەنتتىڭ ءىرى ديستريبيۋتور-كومپانيالارىنىڭ وكىلدەرى، شەتەلدىك جۋرناليستەر، دوكۋمەنتاليستەر مەن بلوگەرلەر قاتىسادى. سوڭعى بەس جىلدا مەديا-سامميت ەڭ وزىق يدەيالار پايدا بولاتىن تانىمال الاڭعا اينالدى.
اپتالىق اياسىندا قاتىسۋشىلار الەمنىڭ ەڭ وزەكتى دەگەن ماسەلەلەرىن تالقىلاپ، پاندەميا جاعدايىندا سالانى دامىتۋ تۋرالى اڭگىمەلەسەدى.
مودەراتورلار قاتارىندا «حابار» اگەنتتىگىنىڭ باسقارما ءتوراعاسى ەرلان بەكحوجين، مەديامەنەدجەر ارمانجان بايتاسوۆ، «حابار» تەلەارناسىنىڭ ديرەكتورى دينارا بيسەمبينا جانە باسقا دا ساراپشىلار بار.
«Astana Media Week اياسىندا «Formats day» اتتى جابىق ءىس-شارا ۇيىمداستىرىلىپ، كورسەتىلەدى. وندا مەدياكونتەنت يەگەرلەرى Fremantle، Discovery، Universal، Kiss Media جانە ت.ب. سياقتى الەمدىك ءوندىرۋشى-ديستريبيۋتورلار جابىق فورماتتاعى ءىس-شاراعا قاتىسۋشىلارعا وزدەرىنىڭ ۇزدىك جانە جاڭا جوبالارىن تانىستىرادى. سونداي-اق شەبەرلىك ساباقتارىنىڭ ىشىندە كوۋچينگ، شەشەندىك ونەر سالاسىنداعى كوشباسشىلاردىڭ ءبىرى راديسلاۆ گانداپاستىڭ ساباعى بولاتىنىن اتاپ ءوتۋ كەرەك»، - دەدى ۇيىمداستىرۋشى ءلاززات امانبەكوۆا.