استانا اكىمى جەڭىس قاسىمبەك Instagram-داعى پاراقشاسىندا قالانى جىلۋمەن جانە سۋمەن قامتاماسىز ەتەتىن ينفراقۇرىلىم نىساندارىنىڭ جۇمىسى تۋرالى جازدى، دەپ حابارلايدى almaty-akshamy.kz
"قالانى جىلۋمەن جانە سۋمەن قامتاماسىز ەتەتىن ينفراقۇرىلىم نىساندارىنىڭ جۇمىس بارىسىمەن تانىستىم. ولار – جەو-3، جەو-2، اۋىز سۋ ستانسياسى (سسس-3)، "تۇران" جانە "وڭتۇستىك-شىعىس" گاز جىلۋ ستانسيالارى. وزدەرىڭىز بىلەتىندەي، وتكەن جىلدىڭ كۇزىندە ءبىز "وڭتۇستىك-شىعىس" گاز جىلۋ ستانسياسىنىڭ، "تۇران" گاز جىلۋ ستانسياسىنىڭ ءبىرىنشى كەزەڭىنىڭ، قۇرىلىسى ۇزاققا سوزىلعان جەو-3 نىسانىن اياقتادىق. بۇل نىساندار قالاعا 1100 ساع/گكال-دان استام جىلۋ بەرەدى. وسىلايشا بىزگە جىلىتۋ ماۋسىمىندا پروفيسيتكە شىعۋعا مۇمكىندىك بەرەدى. سونىمەن قاتار، وتكەن جىلدىڭ جازىندا استانا سۋ قويماسىنان تارتىلاتىن سۋ قۇبىرى جانە ءۇشىنشى اۋىز سۋ ستانسياسى سالىندى"، - دەپ جازدى قاسىمبەك Instagram-داعى پاراقشاسىندا.
سونىمەن بىرگە ول جوعارىدا اتالعان نىسانداردىڭ ءبارى شتاتتىق رەجيمدە جۇمىس ىستەيتىنىن حابارلادى.
"قالانى الداعى ۋاقىتتا دا جىلۋمەن جانە سۋمەن قامتاماسىز ەتۋ ءۇشىن قۋاتىن ارتتىرۋ جانە جاڭا نىساندار سالۋ بويىنشا جۇيەلى جۇمىس جۇرگىزەمىز. ماسەلەن، بيىل تاعى ءبىر "تەلمان" گاز جىلۋ ستانسياسىن (1-كەزەك)، "تۇران" گجس ەكىنشى كەزەگىن سالامىز. ولار قالاعا تاعى 850 گكال/ساع جىلۋ قۋاتىن بەرەدى. قالانى پەرسپەكتيۆالى تۇردە اۋىز سۋمەن قامتاماسىز ەتۋ ءۇشىن ءقازىر سۋ قۇبىرىنىڭ ەكىنشى جەلىسىن سالۋ جۇمىسى ءجۇرىپ جاتىر. نۇرا جەراستى سۋ كوزىنەن سۋ قۇبىرىن جوبالاۋ جانە تەلمان سورعى ستانسياسىن كەڭەيتۋدى جوبالاۋ جۇمىسى اياقتالىپ قالدى"، - دەپ جازدى استانا اكىمى.