30 جەلتوقسان كۇنى ساعات 15:00 - 00:00 ارالىعىندا جالپى سانى 29 رەيستى ورىنداۋ جوسپارلانعان. الايدا، ونىڭ 21ء-ى ەلورداداعى قولايسىز اۋا رايىنا بايلانىستى كەشىكتىرىلسە، 8 رەيس كەيىنگە قالدىرىلدى. ءقازىر استانا حالىقارالىق اۋەجايىندا 2500-دەن استام جولاۋشى ءوز رەيسىن كۇتىپ وتىر.
اۋا رايى سالدارىنان اۋە جولدارى كەستەسىنىڭ بۇزىلۋىنا بايلانىستى ق ر كولىك ءمينيسترى مارات قارابايەۆ جەدەل شتاب قۇرىپ، استانا حالىقارالىق اۋەجايىنا بارلىق اۋەكومپانيانىڭ وكىلدەرىن جينادى. ارنايى قۇرىلعان توپ پەن اۋەكومپانيا وكىلدەرى جولاۋشىلار اراسىندا تۇسىندىرمە جۇمىستارىن جۇرگىزىپ، ساۋالدارىنا جاۋاپ بەرىپ جاتىر.
اۋەجايداعى جولاۋشىلار ءۇشىن Terminals Astana Airport Management باسشىلىعى 2 مىڭنان استام پورسيا ىستىق تاماق پەن ىستىق سۋسىن تاراتتى. رەيستەرى كەشىككەن جولاۋشىلاردىڭ اراسىندا بالالار مەن جاسوسپىرىمدەر بار. ولارعا مەرەكەلىك كوڭىل-كۇي سىيلاۋ ءۇشىن اياز اتا مەن اقشاقار ويىن ويناتىپ، جاڭا جىلدىق سىيلىقتار تاراتۋدا. ودان بولەك، استانا قالاسىنىڭ ونەرپازدارى رەيسىن كۇتىپ وتىرعان جولاۋشىلارعا ارناپ ونەرلەرىن كورسەتۋدە. بارلىق جولاۋشىلار اۋا-رايى قولايسىزدىعىنان ورىن العان كەلەڭسىزدىككە تۇسىنىستىك تانىتىپ، بارلىق سۇراقتارىنا جاۋاپ بەرىپ، قاجەتتى كومەك كورسەتىپ جاتقان ماماندارعا العىستارىن ءبىلدىرىپ جاتىر.
استانا حالىقارالىق اۋەجايىنىڭ اۋەايلاعى اشىق. الايدا اۋەايلاقتاعى اۋا رايى ءالى دە ۇشۋ جانە قونۋ ءۇشىن قولايسىز. سوندىقتان اۋەكومپانيالار رەيستەرىن كەشىكتىرۋ جانە كەيىنگە قالدىرۋ تۋرالى شەشىم قابىلداۋدا.
اۋەجاي جولاۋشىلارعا تاۋلىك بويى قىزمەت كورسەتەدى. ەگەر ءسىز 30-31 جەلتوقسان كۇندەرى ۇشۋ جوسپارلاعان بولساڭىز، رەيسىڭىزدىڭ ستاتۋسىن اۋەجايدىڭ nn-airport.kz رەسمي سايتىنان قاراۋعا نەمەسە 8(7172)702-999 ءنومىرى بويىنشا Call ورتالىققا حابارلاسۋعا بولادى
#ق ر_كولىك_مينيسترلىگىنىڭ_باسپا ءسوز_قىزمەتى