مەملەكەت باسشىسىنىڭ اتىنا جاڭا جىلعا وراي قۇتتىقتاۋ جەدەلحاتتارى كەلىپ ءتۇستى

رەسەي پرەزيدەنتى ۆلاديمير پۋتين مەملەكەت باسشىسىنا زور دەنساۋلىق، باق-بەرەكە، ال قازاقستان حالقىنا بەيبىتشىلىك پەن يگىلىك تىلەدى. ول 2023 جىل قازاقستان مەن رەسەي قاتىناستارى ءۇشىن ايتارلىقتاي تابىستى بولعانىنا نازار اۋداردى.

– ەكىجاقتى بايلانىستاردى ودان ءارى نىعايتۋعا باعىتتالعان بەلسەندى جانە سىندارلى سيپاتتاعى بىرلەسكەن جۇمىستارىمىز، سونداي-اق ەاەو، ۇقشۇ، تمد، شىۇ جانە باسقا دا كوپجاقتى ۇيىمدار اياسىنداعى سەرىكتەستىك بايلانىستارىمىز جالعاسادى دەپ سەنەمىن. بۇل ءبىزدىڭ باۋىرلاس حالىقتارىمىزدىڭ مۇددەسىنە ساي كەلەدى، – دەپ جازىلعان جەدەلحاتتا.

وزبەكستان پرەزيدەنتى شاۆكات ميرزيويەۆ جاڭا جىلدا قاسىم-جومارت توقايەۆتىڭ اسا جاۋاپتى مەملەكەتتىك قىزمەتىنە زور تابىس تىلەپ، باۋىرلاس قازاقستان حالقىنىڭ وسىپ-وركەندەي بەرۋىنە نيەتتەستىك بىلدىرگەن.

– ءبىزدىڭ كونسترۋكتيۆتى جانە دوستىق سيپاتتاعى ديالوگىمىز، ءتۇرلى سالادا قول جەتكىزگەن ۋاعدالاستىقتارىمىز، سونداي-اق ءىرى جوبالاردىڭ تولىققاندى ىسكە اسىرىلۋى كەلەشەكتە جان-جاقتى قارىم-قاتىناسىمىزدى نىعايتۋعا جانە ىنتىماقتاستىعىمىزدى جاڭا دەڭگەيگە كوتەرۋگە ىقپال ەتەرىنە سەنىمدىمىن، – دەپ جازعان وزبەكستان پرەزيدەنتى جەدەلحاتىندا.

قىرعىزستان پرەزيدەنتى سادىر جاپاروۆ ءوز قۇتتىقتاۋىندا ورتاق كۇش-جىگەردىڭ ارقاسىندا قازاق-قىرعىز اراسىنداعى وداقتاستىق بايلانىستار ودان ءارى نىعايىپ، باۋىرلاس حالىقتاردىڭ مۇددەسىنە قىزمەت ەتەدى دەپ سەنىم بىلدىرگەن.

بەلارۋس پرەزيدەنتى الەكساندر لۋكاشەنكو قاسىم-جومارت توقايەۆقا قولعا العان باستامالارىنىڭ تابىستى جۇزەگە اسىرىلۋىنا تىلەكتەستىك ءبىلدىرىپ، قازاقستان حالقىنا بەيبىتشىلىك، مول يگىلىك تىلەگەن.

– ءوتىپ بارا جاتقان جىل حالىقارالىق كۇن تارتىبىندە ماڭىزدى وقيعالارعا تولى بولدى. سونداي-اق كەز كەلگەن قيىندىقتى بىرلەسە ەڭسەرۋگە بولاتىنىن كورسەتتى. بەلارۋس رەسپۋبليكاسى مەن قازاقستان رەسپۋبليكاسى اراسىنداعى دوستىق پەن ءوزارا تۇسىنىستىك ءداستۇرى الداعى ۋاقىتتا دا نىعايا تۇسەتىنىنە، مەملەكەتتەرىمىزدىڭ ءتۇرلى فورماتتاعى ىنتىماقتاستىعى تابىستى بولاتىنىنا سەنىمدىمىن، – دەپ جازىلعان جەدەلحاتتا.

تاجىكستان پرەزيدەنتى ەمومالي راحمون ءوز قۇتتىقتاۋىندا 2023 جىلى قازاق-تاجىك ستراتەگيالىق سەرىكتەستىگى ماڭىزدى جاڭالىقتارمەن ەستە قالعانىن، ەكى حالىق اراسىنداعى ىنتىماقتاستىق ودان ءارى جان-جاقتى دامي بەرەتىنىن اتاپ وتكەن.

سونىمەن قاتار مەملەكەت باسشىسىن قحر ءتوراعاسى سي سزينپين، تۇرىكمەنستان پرەزيدەنتى سەردار بەردىمۇحامەدوۆ، ازەربايجان پرەزيدەنتى يلحام الييەۆ، ارمەنيا پرەمەر-مينيسترى نيكول پاشينيان، فينليانديا پرەزيدەنتى ساۋلي ءنيينيستو، ءباا پرەزيدەنتى مۇحاممەد بەن زايد ءال ناحايان، يران پرەزيدەنتى يبراحيم رايسي، ەستونيا پرەزيدەنتى الار كاريس، ۋكراينا پرەزيدەنتى ۆلاديمير زەلەنسكيي، ءباا ۆيسە-پرەزيدەنتى، پرەمەر-مينيسترى جانە دۋباي ءامىرشىسى مۇحاممەد بەن راشيد ءال ماكتۋم، جاپونيا پرەمەر-مينيسترى فۋميو كيشيدا، نورۆەگيا كورولى V حارالد، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، ءباا ۆيسە-پرەزيدەنتى، پرەزيدەنت اكىمشىلىگىنىڭ باسشىسى مانسۋر بەن زايد ءال ناحايان، رەسەي پرەمەر-مينيسترى ميحايل ميشۋستين، قىتايدىڭ حالىقتىق ساياسي كونسۋلتاتيۆتىك كەڭەسى بۇكىلقىتايلىق كوميتەتىنىڭ ءتوراعاسى ۆان حۋنين جانە شەت مەملەكەتتەردىڭ بۇرىنعى باسشىلارى، حالىقارالىق ءىرى ۇيىمداردىڭ، كومپانيالاردىڭ، بانكتەردىڭ، قارجى ينستيتۋتتارىنىڭ، ديپلوماتيالىق ميسسيالاردىڭ جەتەكشىلەرى مەن باسقا دا رەسمي تۇلعالار قۇتتىقتادى.

قۇتتىقتاۋلار ءالى دە كەلىپ جاتىر.