الماتى قالاسى ۆولونتەرلەر ءفرونت-وفيسى جاڭا جىل مەرەكەسى قارساڭىندا، بالالاردى سەرگىتۋ جانە ولارمەن قىزىقتى ۋاقىت وتكىزۋ ماقساتىندا «مەدەۋ» مۇز ايدىنىندا تەگىن كونكي تەبۋ كەشىن ۇيىمداستىردى.
شاراعا «جانۇيا» جەتىم بالالارعا ارنالعان مامانداندىرىلعان كەشەننىڭ 70-كە جۋىق تاربيەلەنۋشىلەرى قاتىستى، دەپ حابارلايدى Almaty-akshamy.kz.
ۆولونتەرلەر بالالارعا «مەدەۋ» مۇز ايدىنىنا تەگىن كىرۋمەن قاتار، تىسكەباسارلار مەن سۋسىندار ۇسىندى. ۇيىمداستىرۋشىلاردىڭ ايتۋىنشا بالالارعا ارنالعان وسىنداي شارا الداعى ۋاقىتتا جالعاسىن تابادى.
«بۇگىنگى ءىس-شارا ارقىلى ءبىز بالالار ءۇيىنىڭ تاربيەلەنۋشىلەرىن جاڭا جىل مەرەكەسىمەن قۇتتىقتاپ، كوڭىل كۇيلەرىن كوتەرگىمىز كەلدى. سونداي-اق الداعى ۋاقىتتا جالعىز باستى زەينەتكەرلەر مەن مۇمكىندىگى شەكتەۋلى جانداردى جاڭا جىلمەن قۇتتىقتاپ، قايىرىمدىلىق اكسيالارىن ۇيىمداستىرۋدى جوسپارلاپ وتىرمىز»، - دەدى سوزىندە الماتى قالاسى ۆولونتەرلەر فرونت-وفيسىنىڭ جەتەكشىسى باعدات اناربايەۆا.
ءىس-شارا سوڭىندا تاربيەلەنۋشىلەردىڭ قۋانىشىندا شەك بولمادى. بالالار ءۇيىنىڭ تاربيەشىلەرى ءوز كەزەگىندە ۆولونتەرلەرگە مەيىرىمدى جۇرەكتەرى مەن قامقورلىقتارى ءۇشىن شىنايى العىسىن ءبىلدىردى.
ايتا كەتەيىك، اتالمىش شارادا بالالاردىڭ كوڭىل كۇيىن كوتەرىپ قانا قويماي، قاۋىپسىزدىگى ءۇشىن «QAMQOR CHARITY» قوعامدىق قورىنان 20-عا جۋىق ەرىكتى تارتىلدى.