«استانا بالەت» تەاترىنىڭ دۋبايداعى گاسترولدىك ساپارىنىڭ شىمىلدىعى جابىلدى
استانالىق تەاتر قازان ايىنىڭ 27-30 كۇندەرى دۋباي وپەرا ساحناسىندا ونەر كورسەتىپ، كورەرمەن قاۋىمنىڭ ىقىلاسىنا بولەندى. گاسترولدىك باعدارلامانى، ارتىستەردىڭ كاسىبي شەبەرلىگىن جوعارى باعالاعان كورەرمەن زور قوشەمەتىن ءبىلدىردى، دەپ حابارلايدى Almaty-akshamy.kz
«ءبىز دۋبايدا ونەر كورسەتىپ، كورەرمەن قاۋىم ءىلتيپات تانىتىپ، قوشەمەتىن ءبىلدىردى. كورەرمەن زالىندا بوس ورىن بولمادى. كوپتەن بەرى وسى وڭىردە ونەر كورسەتۋگە تالپىنعانىمىز راس، ەندى ءباا ءجيى كەلەمىز دەگەن ۇمىتتەمىز. 9 جىل ىشىندە جيناقتالعان تەاتر رەپەرتۋارى بىرىككەن اراب امىرلىكتەرى تۇرعىندارىنىڭ قىزىعۋشىلىعىن وياتىپ، مادەنيەتتەردىڭ توعىسۋى، الدەبىر رۋحاني ۇندەستىككە ۇلاسارىنا سەنىمدىمىز. ارتىستەرگە، وسى تۋردى ۇيىمداستىرۋشىلارعا العىسىمىز شەكسىز. وسى ساحنادا ءالى تالاي ونەر كورسەتەمىز. بۇعان سەنىم مول»، – دەدى «استانا بالەت» تەاترىنىڭ ديرەكتورى الەكساندر سوۆوستيانوۆ.
تالعامى بيىك ونەرسۇيەر قاۋىمنىڭ نازارىنا شىعىستىڭ عاجايىپ سۇلۋلىعىن پاش ەتەتىن حورەوگرافيالىق تۋىندىلار تارتۋ ەتىلدى: اڭىزعا اينالعان «ماحاببات تۋرالى اڭىز» سپەكتاكلى مەن «بەيبارىس سۇلتان» بالەتى. «استانا بالەت» تەاترى گاسترول شىمىلدىعىن اريف مەليكوۆ مۋزىكاسىنا يۋريي گريگوروۆيچ قويعان ءۇش كورىنىستى «ماحاببات تۋرالى اڭىز» بالەتىمەن اشتى.
سيۋجەت – كونە شىعىس اڭىزىنا نەگىزدەلگەن. سپەكتاكل نازىك، تامساندىرار پلاستيكالىق يىرىمدەردەن قۇرالعان بىرەگەي حورەوگرافيا، سيۋجەت جەلىسى، عاجايىپ كوپشىلىك ساحنالار مەن سەزىمگە تولى دۋەتتەرىمەن تاڭ قالدىرادى. العاش رەت بۇل سپەكتاكل ماريينسكيي، ال كەيىن ۇلكەن تەاتر ساحناسىندا كورسەتىلگەن بولاتىن.
قازان ايىنىڭ 29-30 كۇندەرى كورەرمەن نازارىنا «بەيبارىس سۇلتان» سپەكتاكلى ۇسىنىلدى. ەگيپەت پەن سيريانىڭ ايگىلى بيلەۋشىسى بەيبارىس سۇلتان تۋرالى سپەكتاكلدىڭ قويىلىمىنا دارىندى ونەر قايراتكەرلەرى اتسالىستى: قويۋشى-حورەوگراف – قازاقستاننىڭ ەڭبەك سىڭىرگەن قايراتكەرى مۋكارام اۆاحري، كومپوزيتورلار – حاميت شاڭعالييەۆ پەن الىبەك الپييەۆ، ليبرەتتو اۆتورى – اقىن، قازاقستاننىڭ ەڭبەك سىڭىرگەن قايراتكەرى باقىت قايىربەكوۆ.
ايتا كەتەرلىگى، «استانا بالەت» تەاترى ءباا العاش رەت گاسترولدىك ساپارمەن باردى. بۇعان دەيىن قازاقستاندىق ۇجىم اقش، فرانسيا، يتاليا، رەسەي، جۇڭگو، بەلگيا مەن جاپونيانىڭ ايگىلى ساحنالارىندا ونەر كورسەتكەن.
گاسترولدىك ساپار تاۋەلسىزدىگىمىزدىڭ 30 جىلدىعى اياسىندا، قازاقستان رەسپۋبليكاسى مادەنيەت جانە سپورت مينيسترىگىنىڭ قولداۋىمەن جۇزەگە اسىرىلدى. ەستەرىڭىزگە سالا كەتەيىك، 6 قاراشادا «استانا بالەت» تەاترىندا «ءبىر اكتىلى بالەتتەر كەشى» وتەدى. كەش بارىسىندا عاجايىپ ءبىر اكتىلى قويىلىمداردى تاماشالاي الاسىز: رايموندو رەبەكتىڭ «وتكەنگە ساياحات» بالەتى، سونىمەن قاتار، ارنايى شاقىرىلعان حورەوگراف ريكاردو امارانتەنىڭ ەكى تۋىندىسى – «A Fuego Lento» جانە «Love Fear Loss».