انكارا كىتاپ كورمەسىنە قاتىسۋىنداعى باستى ماقسات – تۇرىك وقىرمانىنا قازاق اۆتورلارىنىڭ شىعارمالارىن تانىستىرۋ.
تۇركيا استاناسى انكارا قالاسىندا 16-شى حالىقارالىق كىتاپ كورمەسى اياقتالدى6 دەپ حابارلايدى Almaty-akshamy.kz
قازاقپاراتتىڭ اقپاراتىنا سايكەس، كورمەگە قازاقستان «قوناق ەل» رەتىندە قاتىسىپ، وقىرمانعا قازاق قالامگەرلەرىنىڭ شىعارمالارى تانىستىرىلدى.
قازاقستاننىڭ تۇركياداعى ەلشىسى ابزال ساپاربەك ۇلىنىڭ ايتۋىنشا، ەلىمىزدىڭ انكارا كىتاپ كورمەسىنە قاتىسۋىنداعى باستى ماقسات – تۇرىك وقىرمانىنا قازاق اۆتورلارىنىڭ شىعارمالارىن تانىستىرۋ.
«بيىل قازاقستان تاۋەلسىزدىگىنىڭ 30 جىلدىق مەرەيتويىن اتاپ ءوتىپ جاتىر. وسى ورايدا مۇنداي كەلەلى ءىس-شارالار ەكى ەلدىڭ مادەني-عىلىمي بايلانىستارىن ودان ءارى كۇشەيتە تۇسەتىندىگى ءسوزسىز»، - دەدى ەلشى.
2005 جىلدان بەرى جىلىنا ەكى رەت وتكىزىلەتىن انكارا كىتاپ جارمەڭكەسى اياسىندا قازاقستاننىڭ ەڭبەك سىڭىرگەن قايراتكەرى، فيلولوگيا عىلىمدارىنىڭ دوكتورى، پروفەسسور ءادىل احمەتوۆتىڭ «كولۋمب داۋىرىنەن بۇرىنعى امەريكالىق «ۇندىستەردىڭ» التايلىق تەگى»، بەلگىلى جازۋشى كەنان كوچ پەن ايابەك ءباينيازوۆتىڭ «تۇرىكشە-قازاقشا، قازاقشا-تۇرىكشە سوزدىگى»، نۇرعالي ورازدىڭ تۇرىكشەگە اۋدارىلعان «قازىعۇرت وقيعالارى»، ورحان سويلەمەز، ايابەك باينيازوۆ جانە شاپاعات جالمانوۆتىڭ «اقىنداردىڭ كوزىمەن – دومبىرا»، باۋىرجان قاراعىز ۇلىنىڭ «كراۆات» ولەڭدەر جيناعى، قازاقتىڭ ۇلى اقىنى جامبىل جابايەۆتىڭ «كوروعلى داستانى»، مالىك وتاربايەۆتىڭ «يۋنۋس ەمرە» جىرلارى، جازۋشى عالىم كۋرشاد زورلۋنىڭ «نۇرسۇلتان نازاربايەۆ ۇلى دالانىڭ رۋحاني جاڭعىرۋى»، «اقىنداردىڭ كوزىمەن – اباي»، ءابىش كەكىلبايەۆتىڭ تۇرىكشەگە اۋدارىلعان كىتابى تانىستىرىلدى.
سونداي-اق كورمە اياسىندا قازاقستاننىڭ تۇركياداعى ەلشىلىگى جانە انكارا حادجى بايرام ۆەلي ۋنيۆەرسيتەتىنىڭ بىرلەسىپ ۇيىمداستىرۋمەن قازاق حالىق پوەزياسىنىڭ ايگىلى تۇلعاسى جامبىل جابايەۆتىڭ 175 جىلدىعىنا ارنالعان عىلىمي كونفەرەنسيا ءوتتى. تاۋەلسىزدىگىمىزدىڭ 30 جىلدىعىنا ورايلاستىرىلعان كونفەرەنسيانى اشقان ەلشى ابزال ساپاربەك ۇلى جامبىلدىڭ قازاق ادەبيەتى مەن ادامزات تاريحىنداعى ورنى ەرەكشە ەكەندىگىنە توقتالدى.
«ۇلى دالا گومەرى اتانعان جامبىل كوزى تىرىسىندە-اق الەمگە ايگىلى بولىپ، قۇرمەتكە بولەندى. ءوز ۇلتىنىڭ رۋحاني قازىناسىن، ۇلى دالانىڭ تەرەڭ فيلوسوفياسىن جىرلارىندا كورسەتە بىلگەن جامبىل ەسكى مەن جاڭانى ۇشتاستىرا بىلگەن»، - دەدى ول.
كونفەرەنسيادا تۇرىكتىڭ بىرنەشە عالىمى جامبىل ءومىرى مەن شىعارماشىلىعى تۋرالى بايانداما جاسادى. ءىس-شارا سوڭىندا قاتىسۋشىلارعا قازاقستاننىڭ تۇركياداعى ەلشىلىگىنىڭ قولداۋىمەن باسىلىپ شىعارىلعان كىتاپتار تارتۋ ەتىلدى. ايتا كەتەيىك، بۇعان دەيىن يتاليا، فرانسيا، يران جانە رەسەي بۇل كورمەگە «قوناق ەل» مارتەبەسىندە قاتىسقان بولاتىن. ال بۇل جولى قازاقستان «قوناق ەل» رەتىندە قاتىسىپ جاتقان 16-شى انكارا حالىقارالىق كىتاپ كورمەسىنە 350 جازۋشى، 174 باسپا ءۇيى ات باسىن بۇرىپ، 100 مىڭنان استام كىتاپ وقىرمان نازارىنا ۇسىنىلدى. سونىمەن قاتار كورمە اياسىندا 43 جازۋشىمەن كەزدەسۋ ءوتتى.