ەلوردالىق اۋەجاي ۋاقىتشا جابىلۋ كۇندەرىن جاريالادى.
ەلوردالىق اۋەجاي جۇمىس ۋاقىتىندا ۇشۋ-قونۋ جولاعىنىڭ جابىلۋ كۇندەرىن جاريالادى، دەپ حابارلايدى اlmaty-akshamy.kz.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، استانا حالىقارالىق اۋەجايىنىڭ قىزمەتكەرلەرى ۇشۋ-قونۋ جولاعىن رەزەڭكە قالدىعىنان تازارتادى. جۇمىستار ازاماتتىق اۆياسياداعى اۋەايلاقتى قامتاماسىز ەتۋ قاعيدالارى شەڭبەرىندە ورىندالاتىن بولادى.
ەرەجەگە سايكەس، اۋەايلاق قىزمەتىنىڭ ماماندارى جىلىنا ەكى رەت ۇشۋ-قونۋ جولاعىنداعى رەزەڭكە قالدىقتارىن الىپ تاستاۋعا مىندەتتى. مۇنداي جۇمىستاردى ورىنداۋ ۇقج-نى كەم دەگەندە 4 ساعاتقا جابۋدى تالاپ ەتەدى.
سونىمەن قاتار، ۇشۋ-قونۋ ەڭ از ورىندالاتىن كۇندەر الدىن-الا انىقتالدى. بۇل - 31 مامىر مەن 7 ماۋسىم كۇندەرى ساعات 13:20-دان 17:20-عا دەيىنگى ۋاقىت.
ايتپاقشى، رەزەڭكە قاباتتارىن كەتىرۋ جۇمىستارى ارنايى سۇيىقتىق پەن ششەتكا ارقىلى جۇزەگە اسىرىلادى. رەزەڭكە قاباتتارىن الىپ تاستاۋ اۋەجايلاردا جوسپارلى جۇمىستار بولىپ تابىلادى جانە ۇشۋ قاۋىپسىزدىگىن قامتاماسىز ەتۋ ماقساتىندا ورىندالادى.