بەيجىڭدە تانىمال قازاق اندەرىنىڭ العاشقى اۋدارما جيناعىنىڭ تۇساۋكەسەرى ءوتتى.
جۇڭگو استاناسىندا قازاقستان رەسپۋبليكاسى قحر-داعى ەلشىلىگىنىڭ قولداۋىمەن اباي قۇنانبايەۆ، ءشامشى قالداياقوۆ، التىنبەك قورازبايەۆ، نۇرعيسا تىلەندييەۆ جانە باسقالاردىڭ 30 بەلگىلى مۋزىكالىق شىعارماسىن قامتيتىن جۇڭگو تىلىندەگى تانىمال قازاق اندەرىنىڭ العاشقى اۋدارما جيناعىنىڭ تۇساۋكەسەرى ءوتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
اندەردى اۋدارۋدى مۋزىكا حالىق باسپاسىنىڭ جاردەمىمەن بەلگىلى جازۋشى، جۇڭگو حالىقتىق ساياسي كونسۋلتاتيۆتىك كەڭەسىنىڭ بۇرىنعى دەپۋتاتى اكبار ءماجيت ۇلى جۇزەگە اسىردى.
ءىس-شارانىڭ قوناقتارى قىتايدىڭ مەملەكەتتىك ورگاندارى، اكادەميالىق جانە شىعارماشىلىق زيالىلارى، قازاق دياسپوراسىنىڭ وكىلدەرى، سونداي-اق قىتايلىق جانە قازاقستاندىق ب ا ق جۋرناليستەرى بولدى.
قازاقستاننىڭ قىتايداعى ەلشىسى شاحرات نۇرىشيەۆ ءوزىنىڭ ءسوز سويلەۋىندە مۋزىكا مەن اندەر ارقىلى حالىقتار اراسىندا مادەنيەت پەن ادەت-عۇرىپتى تەرەڭىرەك قابىلداۋ ورىن الاتىنىن ەرەكشە اتاپ ءوتتى. وسىعان وراي، ول بۇل جيناق قازاقستان مەن جۇڭگو اراسىنداعى دوستىق پەن تاتۋ كورشىلىكتىڭ ىرگەتاسىنا تاعى ءبىر جارقىن ۇلەس بولاتىنىنا سەنىم ءبىلدىردى. قازاقستاندىق ديپلومات ءوز سوزىندە بيىلعى جىلى قىتايدا مادەني ءىس-شارالاردى ۇيىمداستىرۋ جوسپارلارىمەن دە ءبولىستى.
اكبار ءماجيت ۇلى (1954 جىلى تۋعان) – جۇڭگو تىلىندە جازاتىن از ۇلتتارى وكىلدەرىنەن تۇراتىن قحر-دىڭ كورنەكتى جازۋشىلارىنىڭ ءبىرى. 1982 جىلى باستاپ جۇڭگو جازۋشىلار وداعىنىڭ مۇشەسى، قحر حالىقتىق ساياسي كونسۋلتاتيۆتىك كەڭەسىنىڭ دەپۋتاتى بولعان، ءۇش رەت قحر مەملەكەتتىك سىيلىعىنىڭ يەگەرى، II دارەجەلى «دوستىق» وردەنىنىڭ كاۆالەرى، وننان استام كىتاپتىڭ، ونىڭ ىشىندە اباي شىعارمالارى اۋدارمالارىنىڭ اۆتورى بولىپ تابىلادى.
اكبار ءماجيت ۇلىنىڭ اۋدارمالارى مەن شىعارماشىلىق ىزدەنىستەرىنىڭ ارقاسىندا بۇگىنگى تاڭدا قىتايلىق وقىرماندار قازاق ادەبيەتىنىڭ كورنەكتى كلاسسيكتەرى مەن تانىمال كومپوزيتورلاردىڭ شىعارمالارىمەن تانىسا الادى.